Հայաստանի Ազգային արխիվի համար 2013 թվականը մեծ ձեռբերումների եւ նոր տեխնոլոգիաների կիրառման տարի էր: Այս մասին լրագրողների հետ հանդիպմանը, ամփոփելով տարին, ասաց Ազգային արխիվի տնօրեն Ամատունի Վիրաբյանը : Նրա խոսքով` արխիվը 2013 թվականին համալրվել է 35 հազար արխիվային փաստաթղթերով:
«Տարին արխիվի համար բավական հաջող էր: Մենք կարողացել ենք թվայնացնել շուրջ 119 հազար թերթ արխիվային փաստաթուղթ»,- «Արմենպրես»-ի հաղորդմամբ` ասաց նա:
Վիրաբյանը նշեց, որ բավական մեծացել է քաղաքացիների հետաքրքրությունն արխիվի նկատմամբ: «Այս տարի 29 հազար հարցում ենք ստացել` նախորդ տարվա 24 հազարի փոխարեն»,- ասաց Ազգային արխիվի տնօրենը` հավելելով, որ արխիվի փաստաթղթերի թիվը կազմում է 4 մլն 124 հազար 796 միավոր:
Վիրաբյանի խոսքով` այս տարի արխիվում 40-ով ավելացել է նաեւ հետազոտողների թիվը` 530-ից դառնալով 570:
Հայաստանի ազգային արխիվը հիմնադրվել է 1923 թվականին: Ներկայում ՀԱԱ ենթակայությամբ գործում են 11 մարզային մասնաճյուղեր եւ 29 տարածքային ներկայացուցչություններ, ուր 2006թ. հունվարի 1-ի դրությամբ կենտրոնացված են ամբողջությամբ վերցրած 5759 ֆոնդՙ 3,419,353 պահպանման միավորներով: Արխիվում պահպանվող բոլոր փաստաթղթերը մատչելի են օգտագործողների համար, բացառությամբ անձնական եւ ընտանեկան գաղտնիքի մասին տեղեկություններ տարածող, նաեւ ոչ բավարար պահպանվածության վիճակ ունեցող փաստաթղթերի:
