ԹՈՒՐՔԵՐԸ ԳԼԽԱԳԻ՞Ն ԵՆ ՎՃԱՐՈՒՄ ՍԻՐԻԱՅՈՒՄ ՍՊԱՆՎԱԾ ԱՄԵՆ ՄԻ ՀԱՅԻ ՀԱՄԱՐ
ՍԴՀԿ մամլո դիվան
Երեկ Երեւանում Սիրիայի դեսպանատանը տեղի ունեցավ հանդիպում Հայաստանում Սիրիայի գործերի ժամանակավոր հավատարմատար Իսսամ Նայալի եւ Սոցիալ դեմոկրատ հնչակյան կուսակցության Հայաստանի վարչության ատենապետ Նարեկ Գալստյանի միջեւ: Վերջինիս ուղեկցում էին ՍԴՀԿ Հայաստանի վարչության անդամներՙ փոխատենապետ Վազգեն Մեսրոպյանը, դեսպանորդ Դմիտրի Մարտիրոսյանը եւ Գագիկ Մելիքյանը: Հանդիպման ընթացքում պարոն Նայալը շնորհակալություն հայտնեց Հայաստանին ու հայ ժողովրդին Սիրիայի հարցում ունեցած հավասարակշիռ վերաբերմունքի համար, ինչպես նաեւ ընդգծեց Սիրիայում բնակվող հայերի դերն այդ երկրում խաղաղության ամրապնդման հարցում: ՍԴՀԿ ատենապետն ընդգծեց իրենց համար Սիրիայի տարածքային ամբողջականության պահպանման, ինչպես նաեւ եղբայրական երկրում խաղաղության հաստատման կարեւորությունը: Խոսելով տարածաշրջանային խնդիրների մասինՙ Նարեկ Գալստյանն իր խոսքում նկատեց, որ Սիրիայում խաղաղության հաստատմանը դեմ է հատկապես Թուրքիան, ինչպես նաեւ հիշեցրեց, որ միջազգային մամուլում բազմիցս նշվել է այն փաստը, որ Թուրքիան ամեն ինչ անում է, որ Սիրիայում քրիստոնյաներ ու հատկապես հայեր չմնան, հայկական համայնքը վերանա:
«Խոսակցություններ կան, որ որոշ թուրքական կազմակերպություններ գլխագին են նշանակել ամեն մի սպանված հայի համար»,- նշեց ՍԴՀԿ ատենապետը:
ՀՀ-ում Սիրիայի գործերի ժամանակավոր հավատարմատարը հույս հայտնեց, որ շուտով Սիրիայում խաղաղություն կվերահաստատվի, եւ Սիրիայի ու Հայաստանի միջեւ կվերականգնվեն երբեմնի աշխույժ եւ սերտ քաղաքական, տնտեսական եւ մշակութային կապերը:
