Հայաստանի բնակիչները տարեցտարի ավելի հաճախ են օգտվում բանկային ծառայություններից, այդ թվումՙ ավելացնելով բանկերում ներդրվող ավանդները: Այս եզրակացությանը կարելի է գալ Ազգային վիճակագրական ծառայության հրապարակած ցուցանիշներից:
Համաձայն պաշտոնական վիճակագրության, Հայաստանում նախորդ երեք տարիներին` 2010-2012 թվականերին, ավելացել է բանկերի եւ նրանց մասնաճյուղերի քանակը: 2010-ին Հայաստանի բոլոր բանկերն ունեցել են 430 մասնաճյուղեր, 2011-ին` 442 մասնաճյուղ, 2012-ին` 476: Համապատասխանաբար աճել է նաեւ այդ բանկերի մասնաճյուղերում սպասարկվող քաղաքացիների թիվը:
Եթե 2010 թվականի ընթացքում բանկային ծառայություններից օգտվել է 1 մլն 68 հազար քաղաքացի, 2011-ին` 1 մլն 288 հազար քաղաքացի, ապա 2012-ին բանկերում սպասարկված անձանց թիվը գերազանցել է 1,5 մլն-ը` կազմելով 1 մլն 541 հազար քաղաքացի:
2010-ին Հայաստանի բանկերում ֆիզիկական անձանց ներդրված ավանդների ընդհանուր գումարը կազմել է 356 մլն դրամ, 2011-ին 483 մլն դրամ, իսկ 2012-ին` 638 մլն դրամ: Ավելացել են նաեւ ներդրող ավանդի միջին չափը եւ ավանդի միջին չափը մեկ շնչի հաշվով:
2010-ին ավանդի միջին չափը կազմել է 333 հազար դրամ, 2011-ին` 375 հազար դրամ, 2012-ին` 414 հազար դրամ: Բնակչության մեկ շնչի հաշվով այդ ցուցանիշները հետեւյալն են եղել` 2010-ին 109 հազար դրամ, 2011-ին` 114 հազար դրամ, 2012-ին` 136 հազար դրամ:
Այս ցուցանիշները վկայում են երկու միտումի մասին: Առաջին` ավելացել է մրցակցությունը բանկերի միջեւ, ինչի արդյունքում նրանք ձգտում են գրավել նոր հաճախորդներ եւ արդյունքում ավելանում են թե բանկերում սպասարկվող անձանց թիվը, թե բնակչության կողմից բանկերում ներդրվող ավանդները:
Երկրորդ միտումն այն է, որ ավելացել է բանկերի նկատմամբ վստահությունը: Այստեղ կարեւոր նշանակություն ունի ավանդների հատուցումը երաշխավորող հիմնադրամի առկայությունը: Սոցիոլոգիական հարցման միջոցով է հնարավոր ավելի հստակ պատկեր ունենալ, թե որքանով են մարդիկ վստահում բանկերին, բայց ֆինանսական գործիքներից օգտվելու ցուցանիշի եւ բանկային ավանդների ավելացումը անուղղակիորեն վկայում են, որ վստահության աճ կա:
Բերված ցուցանիշները խոսում են մեկ այլ գործոնի մասին եւս, որը կարող է մեր հայրենակիցների հավերժ դժգոհող հատվածին դուր չգալ, բայց փաստերից փախչել չես կարող: Եթե ավելանում են բանկերում ներդրվող ավանդները, ապա դա բնակչության եկամուտների ավելացման ցուցանիշ է: Եվ այնպես էլ չէ, թե դա ոչ մեծ թիվ կազմող մեծահարուստների շնորհիվ է տեղի ունենում, քանի որ նրանք հազիվ թե իրենց գումարները պահեն հայաստանյան բանկերում: Բացի դրանից, ավելացել են ոչ միայն ավանդների ընդհանուր, այլեւ դրանք ներդնող մարդկանց եւ բանկերի մասնաճյուղերի թվերը:
