Իսպանիայի կառավարությունը որոշել է շրջափակել հանրաքվեի միջոցով անկախանալու Կատալոնիայի ծրագրերը: Հանրաքվեն նախատեսված է անցկացնել 2014 թ. նոյեմբերի 9-ին, հաղորդում է BBC-ն:
«Քվեարկությունը չի կայանա», լրագրողներին հայտարարել է Իսպանիայի արդարադատության նախարար Ալբերտո Ռուիս-Գալյարդոնը:
Ավելի վաղՙ հինգշաբթի օրը, Կատալոնիայի կառավարության նախագահ Արթուր Մասը ասել էր, որ տարածաշրջանի իշխանությունները որոշել են հանրաքվեի օրը եւ ներկայացվելիք երկու հարցերըՙ մնալ Իսպանիայի կազմո՞ւմ, թե՞ դառնալ անկախ պետություն:
Սակայն Իսպանիայի առաջատար քաղաքական ուժերըՙ կառավարող Ժողովրդական կուսակցությունը վարչապետ Մարիանո Ռախոյի գլխավորությամբ եւ ընդդիմադիր Սոցիալիստական կուսակցությունը դեմ են նման հանրաքվեի անցկացմանը:
Կատալոնիայի ինքնավար մարզը, որի բնակչությունը մոտ 7,5 միլիոն է, Իսպանիայում տնտեսապես առավել զարգացած շրջաններից մեկն է: Մարզն ունի բավական լայն ինքնավարություն, բայց վերջին տարիների տնտեսական ճգնաժամը խթանեց կատալոնացիների ազգայնական տրամադրությունները: Սեպտեմբերին հարյուրհազարավոր կատալոնացիներ, 400 կիլոմետր կենդանի շղթա կազմելով, ցուցադրեցին իրենց անկախության ձգտումը:
Մասը ավելի վաղ սպառնացել էր, որ եթե Մադրիդը ընդդիմանա մարզում հանրաքվեի անցկացմանը, ապա այն կանցկացվի 2016-ին նշանակված շրջանային ընտրությունների փոխարեն:
Սոցիոլոգիական հարցումների տվյալների համաձայնՙ Կատալոնիայի բնակչության կեսը հանդես է գալիս անկախանալու եւ Իսպանիայից անջատվելու օգտին:
Կատալոնացիներից շատերը դժգոհում են, որ մարզն արտադրում է երկրի ՀՆԱ 1/4-ը, բայց պետբյուջեից ստանում է անհամեմատ պակաս:
Եվրոմիությունը եւ ՆԱՏՕ-ն նախազգուշացրել են, որ Իսպանիայից անջատվելու դեպքում Կատալոնիան ինքնաբերաբար չի հայտնվի իրենց շարքերում:
