ԱՎԻԱՑԻԱՅԻ ՈԼՈՐՏԻ ՊԱՅՄԱՆԱԳՐԵՐԻ ՊԱՏԱՍԽԱՆԱՏՈՒՆ ԿԼԻՆԻ ԷԿՈՆՈՄԻԿԱՅԻ ՆԱԽԱՐԱՐՈՒԹՅՈՒՆԸ

Օդային փոխադրումների ազատականացման ու բաց երկնքի քաղաքականության ներդրմանն ուղղված միջոցառումներն ապահովելու բնագավառում կառավարությունը երեկ որոշեց, որ ՀՀ կառավարության եւ օտարերկրյա պետությունների կառավարությունների միջեւ օդային հաղորդակցության ոլորտում կնքված միջազգային պայմանագրերում փոփոխություն եւ լրացում կատարելու, ինչպես նաեւ միջազգային նոր երկկողմ պայմանագիր կնքելու վերաբերյալ բանակցություն վարելու, պայմանագրի տեքստը մյուս կողմի հետ փոխհամաձայնեցնելու գործառույթներն իրականացնելու է էկոնոմիկայի նախարարությունը` քաղաքացիական ավիացիայի գլխավոր վարչության ներգրավմամբ: Նշվեց, որ արդեն իսկ կնքված կամ կնքվելիք միջկառավարական համաձայնագրերը վերանայվելու են սահմանափակումների վերացման ուղղությամբ, ինչը դրական ազդեցություն կունենա տնտեսության, աշխատատեղերի ստեղծման, ուղեւորների քանակի աճի եւ ավիափոխադրումների սակագնի իջեցման վրա: