Հայտնի է դարձել 2-րդ միջինքաշային կարգում WBO-ի վարկածով աշխարհի նախկին չեմպիոն Արթուր Աբրահամի եւ այդ տիտղոսի ներկայիս տեր Ռոբերտ Շտիգլիցի նոր մենամարտի անցկացման վայրն ու ժամկետը: Մրցակիցներն աշխարհի չեմպիոնի տիտղոսը կվիճարկեն 2014-ի մարտի 1-ին Գերմանիայի Մագդեբուրգ քաղաքում:
Մենամարտի կազմակերպման համար հայտարարված մրցույթը շահել է Շտիգլիցի պրոմոութերին պատկանող Sport Event Steinforth պրոմոութերական ընկերությունը, որն առաջարկել էր 3,1 մլն դոլար: Իսկ Աբրահամի պրոմոութերին պատկանող Sauerland Event-ն առաջարկել էր 1,5 մլն դոլար: Մենամարտի համար Ռոբերտ Շտիգլիցը կստանա 2,1 մլն դոլար, իսկ Աբրահամի պարգեւաճարը կկազմի 800 հազար:
Եվ այսպես, հաջորդ տարվա գարնան առաջին օրը 33-ամյա Արթուր Աբրահամը 3-րդ անգամ կմենամարտի Ռոբերտ Շտիգլիցի հետՙ փորձելով ռեւանշի հասնել մրցակցի նկատմամբ ու վերադարձնել չեմպիոնական գոտին: Այն Աբրահամից Շտիգլիցը խլել էր այս տարվա մարտին կայացած մենամարտում: Իսկ 2012-ի օգոստոսին Արթուր Աբրահամն առաջին անգամ էր նվաճել միջինքաշային կարգում աշխարհի չեմպիոնի տիտղոսըՙ հաղթելով Շտիգլիցին:
Հերթական մենամարտը Արթուր Աբրահամի համար կլինի 43-րդը պրոֆեսիոնալ ռինգում: Արթուրը շահել է 38 մենամարտ, կրել է 4 պարտություն: Շտիգլիցի համար հերթական մենամարտը կլինի հոբելյանականՙ 50-րդը: Շտիգլիցը տոնել է 46 հաղթանակ, կրել է 3 պարտություն:
