Հարավային Կալիֆոռնիայում գործող հումանիտար գիտությունների լութերական մասնավոր համալսարանըՙ CLU-ն դարձել է ամերիկյան հինգերորդ կրթօջախը, որն իր առաջին կուրսեցիների (մոտ հազար ուսանող) պարտադիր գրականության ցանկում ընդգրկել է Փիթեր Բալաքյանի հայտնի «Ճակատագրի սեւ շունը» հատորը: Այս մասին է տեղեկացնում Թալին Բաբայանը «Արմինն Միոր` Սփեքթեյթր» շաբաթաթերթի նոյեմբերի 30-ի համարում: Վերջին տարիներին նման որոշում ընդունել էին նաեւ Նյու Ջերսիի քոլեջը, Կոնեկտիկուտի համալսարանը, Սիեննա քոլեջը եւ Կոլգեյթ համալսարանը:
Լութերական համալսարանի ղեկավարները գտել են, որ Բալաքյանի հուշագրությունների հատորը հրաշալի միջոց է առաջին կուրսեցիներին ընդգրկելու «Փորձառությունների ծրագրում», որի նպատակն է զարգացնել ուսանողների շրջանում բարոյական դիրքորոշում դրսեւորելը իրենց մասնագիտական պարտավորություններում:
«Բալաքյանի գիրքը նպաստում է ինքն իրեն բացահայտելուն եւ դա մեր ծրագրի պայմաններին համահունչ է: Դա նեղ, անձնական բացահայտում չէ, այլ ավելի հեռուն է գնումՙ օգնելով այլոց հասկանալու, թե ինչքան կարեւոր է իրազեկ լինել իրենց անցյալի պատմությանը», նշել է այս առթիվ վերոնշյալ համալսարանում անգլերեն լեզվի պրոֆեսորի օգնական Ջեյմս Բոնդը:
«Ճակատագրի սեւ շունը» ունեցել է ավելի քան տասը հրատարակություններ, իսկ լույսընծայման 10-րդ տարեդարձի առթիվ վերահրատարակվել է լրամշակված (2 նոր գլուխների հավելումով) տարբերակով:
