Նախնական մասնագիտական (արհեստագործական) եւ միջին մասնագիտական կրթական ծրագրեր իրականացնող պետական ուսումնական հաստատություններում ուսանողական նպաստ եւ պետական կրթաթոշակ տրամադրելու երեկ կառավարության հաստատած կարգի համաձայն, այդ հաստատություններ ընդունված սահմանամերձ կամ բարձրլեռնային բնակավայրերի ուսանողների ուսուցման վճարն ամբողջությամբ կփոխհատուցվի պետության կողմից: Անդրադառնալով այս որոշմանըՙ վարչապետ Տիգրան Սարգսյանը նշեց, որ կրթության հասանելիությունը աղքատության հաղթահարման արդյունավետ բաղադրիչներից է, եւ այս քայլը կարեւոր քաղաքական բովանդակություն ունի: Նա հանձնարարեց հարցը ներկայացնող կրթության եւ գիտության փոխնախարարինՙ որոշման մանրամասները հանգամանալից ներկայացնել հանրությանը:
Մեկ այլ որոշմամբ հաստատվեց ՀՀ բարձրագույն ուսումնական հաստատությունների առկա ուսուցման 2014-2015թթ. ուսումնական տարվա մասնագիտությունների եւ ընդունելության քննությունների ցանկը:
