«Երեւանյան հեռանկարներ» 14-րդ միջազգային երաժշտական փառատոնը նոյեմբերի 28-ին, երաժշտական տոն է խոստանում երաժշտասեր հանրությանը:
Արամ Խաչատրյան համերգասրահում այսօր տեղի կունենա աշխարհահռչակ ջութակահար եւ դիրիժոր Մաքսիմ Վենգերովի համերգը, որին կնվագակցելու է դաշնակահար եւ դիրիժոր Վահագն Պապյանը: Երաժիշտների կատարմամբ կհնչեն Բախ, Ֆրանկ, Բրամս, Դվորժակ, Կրայսլեր, Վենյավսկի, Շոստակովիչ, Ցիգանով, Պագանինի, Իզայի, Սեն Սանս:
Վենգերովը երեկ լրագրողների հետ հանդիպմանը նշեց. «Ինձ համար շատ հուզիչ է կրկին Հայաստանում լինել, քանի որ այստեղ ունեմ շատ ընկերներ, ինչպես նաեւ միշտ էլ բախտավորություն է գտնվել այն երկրում, որն ունի Արամ Խաչատրյան եւ արվեստի այլ գործիչներ, որոնք հայկական մշակույթն են սփռել աշխարհով մեկ»:
Աշխարհահռչակ երաժիշտը հավելեց, որ մեծ պատիվ է իր համար հայ ազգի պատմությանը մոտենալ` գտնվելով Հայաստանում:
Վենգերովն իր խոսքում նշեց, որ շատ է արժեւորում հայկական մշակույթը. «Սիրում եմ Խաչատրյանի Ջութակի կոնցերտը, միշտ ցանկացել եմ կատարել այն, սակայն դեպքերի բերումով երբեք կյանքի չի կոչվել երազանքս»:
Ջութակահար Մաքսիմ Վենգերովը դաշնակահար Վահագն Պապյանի հետ արդեն 20 տարի է, ինչ համագործակցում է, եւ այժմ նոր ձայնասկավառակ են պատրաստում թողարկել. «Ուրախ եմ, որ հատկապես նրա հետ եմ նվագելու: Մեր ընկերությունը ոչ միայն բեմի վրա է, այլ նաեւ հոգեւոր դաշտում: Կարծում եմ հայ հանդիսականը համերգին կզգա մեր հոգեւոր մտերմությունը»:
Մ. Վենգերովը նշեց, որ որպես ջութակահար իրեն համարում է ռուսական դասական երաժշտության լավագույն ավանդույթների շարունակողը` մասնավորապես Մստիսլավ Ռոստրոպովիչի ավանդույթների շարունակողը:
«Մեր օրերում էլ տաղանդավոր կոմպոզիտորներ կան, որոնց խնդրում եմ ինձ համար նոր ստեղծագործություններ գրել: Ջութակն իմ տարերքն է, ջութակն իմ մայրենի լեզուն է, որն օրեցօր ավելի եմ բացահայտում ինձ համար»:
Երաժիշտը շնորհակալ է Հայաստանին, քանի որ տարիներ առաջ, երբ առաջին անգամ Հայաստան էր եկել, համերգով հանդես է եկել իր ներկայիս կնոջ` Օլգայի հետ, եւ այժմ նրանք ամուսիններ են. «Այն ժամանակ մենք նոր էինք շփվում եւ մտերիմ չէինք, բայց ձեր մթնոլորտը շատ տրամադրող էր: Այո, ճիշտ են ասում, սիրելիիդ պետք է հանդիպես ճիշտ տեղում: Այժմ մենք երկու աղջիկ ունենք»:
Երաժիշտը նշեց, որ պլանավորում է համերգներ ունենալ մի շարք երկրներում, այդ թվում`աֆրիկյան:
Պատասխանելով այն հարցին` թե ավելի հեշտ է ջութակահար, թե դիրիժոր լինելը, Մաքսիմ Վենգերովը նկատեց, որ խմբավարությունը մասնագիտություն է ամբողջ կյանքի համար, որով զբաղվելու համար, սակայն, որեւէ երաժշտական գործիքի պետք է տիրապետել:
Նշենք, որ ռուսական ծագմամբ Իսրայելից ժամանած ջութակահարը ծնվել է 1974 թվականին, Նովոսիբիրսկում: 1990 թ. դարձել է Լոնդոնում անցկացվող Ֆլեշի անվան ջութակահարների մրցույթի դափնեկիր, իսկ 1995 թվականին արժանացել է Իտալիայի Կիջի ակադեմիայի մրցանակին որպես «ականավոր երիտասարդ երաժիշտ»:
Երաժիշտը UNICEF-ի պատվո դեսպան է եւ նվագել է Ուգանդայի, Հարլեմի, Թայլանդի եւ Կոսովոյի երեխաների համար: 2004 թ. Վենգերովը դարձել է «Գրեմմի» մրցանակի դափնեկիր: 2011թ. վարպետության դաս է անցկացրել Հայաստանում ստեղծված UNICEF-ի մանկական նվագախմբի համար:
