Բուենոս Այրեսում Դավիթ Նալբանդյանի մարզական կարիերայի ավարտին նվիրված թենիսի ցուցադրական մրցաշարում արգենտինահայ թենիսիստը 3-6, 4-6 հաշվով պարտվեց աշխարհի թիվ 1 ռակետ Ռաֆայել Նադալին: Այնուհետեւ Նալբանդյանն ընկերակցելով Խուան Մոնակոյին, զուգախաղում պարտվեց Նադալ-Ջոկովիչ զույգին:
31-ամյա Դավիթ Նալբանդյանն ուսի վնասվածքի պատճառով դեռեւս հոկտեմբերին էր հայտարարել թենիսիստի կարիերան ավարտելու մասին: Նա դարձել է 11 մրցաշարերի հաղթող, իսկ «Մեծ սաղավարտի» մրցաշարերում ամենամեծ հաջողությանը հասել է 2002-ին Ուիմբլդոնի մրցաշարումՙ մտնելով եզրափակիչ, որտեղ պարտվել է ավստրալացի Լեյթոն Հյուիթին:
«Շատ ուրախ եմ, որ մասնակցեցի Դավիթ Նալբանդյանի հրաժեշտի խաղերին: Դավիթի, Ռաֆայել Նադալի եւ Խուան Մոնակոյի հետ այս օրերին հիանալի զվարճացանք», նշել է սերբ թենիսիստ Նովակ Ջոկովիչը:
