Մեր ազգակիցներից նրանք, ովքեր տառապում են քաղցկեղով կամ ծանր այլ հիվանդությամբ, որպես փրկության վերջին հույս ձգտում են բուժվել դրսում, հատկապես Գերմանիայում, դրա համար ծախսելով իրենց ունեցածն ու չունեցածը, հաճախ նաեւ հարազատների ու բարերարների տրամադրած գումարները: Անշուշտ, Գերմանիան ունի բժշկական բարձրակարգ համակարգՙ հայտնի ողջ աշխարհում: Սակայն Հայաստանից ու Մոսկվայից մեր ազգակիցները Գերմանիա բուժման մեկնելու ճանապարհին հանդիպում են միջնորդական ծառայություններ առաջարկողների, որոնցից մեկի մասին օրերս հոդված է հրատարակել գերմանան «Շպիգել» շաբաթահանդեսը, դիմակազերծելով այդ միջնորդ խաբեբաներից մեկինՙ Արսեն Բաբայանին, որն օգտվելով օրհասական վիճակում գտնվող հիվանդի կամ նրա հարազատների հուսահատ վիճակիցՙ կողոպտում է նրանց բառի իսկական առումով: Շնորհիվ իր գովազդային ցանցի ու Երեւանում բացած IMZ Yerevan գրասենյակի «միջնորդական առաքելության», այս անձը գանձում է ոչ միայն իր «ծառայությունների», այլեւ Գերմանիայում հիվանդանոցային բուժման համար կրկնապատկված ու եռապատկված հաշվեցույցերի դիմաց:
Մեր վաղվա համարում թարգմանաբար ներկայացնում ենք «Դեր Շպիգելի» հոդվածը:
