Նոյեմբերի 19-ի առավոտյան Բեյրութի հարավումՙ Բիր Հասան (Ջանա) շրջանում որոտացել է երկու պայթյուն:
Սկզբում Ռոյթեր գործակալությունը հաղորդել է, որ քաղաքում պայթել է երկու հրթիռ, որոնցից մեկը վնասել է Իրանի դեսպանատան շենքը: Սակայն ավելի ուշ հայտնի է դարձել, որ շենքի մոտ պայթեցվել է ականված ավտոմեքենա:
Շիա արմատականների «Հզբոլլահ» խմբավորմանը պատկանող «Ալ Մանար» հեռուստաալիքի տվյալներով, Իրանի եւ Եմենի դեսպանատների մոտ իրեն պայթեցրել է մի մահապարտ ահաբեկիչ, իսկ հետո պայթել է մի ականված ավտոմեքենա: Երկու դեսպանատների շենքերը էական վնասներ են կրել: Հեռուստաալիքը նշում է, որ կան շուրջ 25 զոհ եւ տասնյակ վիրավորներ, մեծ մասըՙ խաղաղ բնակիչներ:
«Ֆիգարո» թերթի կայքէջը, բժշկական աղբյուրներ վկայակոչելով, հաղորդում է, որ սպանվածների թիվը առնվազն 22 է, վիրավորներինըՙ 146: Իրանի դեսպանը չի տուժել: Նա հայտարարել է, թե «դեսպանատան ներսում» զոհեր չկան: Սակայն, «Ֆիգարոյի» տվյալներով, դեսպանության մշակութային խորհրդատուն զոհվել է, իսկ պահակախմբի մեջ կան վիրավորներ:
«Հզբոլլահի» կենտրոնավայր համարվող Ջանան անցյալում արդեն հրթիռակոծվել էր: Այդ հարձակումների պատասխանատվությունը ստանձնել էին սուննի խմբավորումները, որոնք այդպիսով վրեժ էին լուծել Սիրիայի նախագահ Բաշար Ասադի կողմից այդ երկրում ռազմական գործողություններին «Հզբոլլահի» մասնակցության համար:
