Արդարադատության նախարարըՙ կոռուպցիոն ռիսկերի նվազման մասին
Արդարադատության նախարար Հրայր Թովմասյանը երեկ, կառավարության նիստից հետո, լրագրողների հետ զրույցում ասաց, որ Հայաստանում կոռուպցիոն ռիսկերը նվազել են, եւ որպես վկայություն բերեց ԱՄՆ «Հազարամյակի մարտահրավերներ» կորպորացիայի հայտարարությունն, ըստ որի Հայաստանում կոռուպցիայի հաղթահարման առումով առաջընթաց կա: Նա հիշատակեց իրավաբանական անձանց գրանցման գործընթացի հեշտացումը, որը կատարվում է 15 րոպեում, առանց որեւէ մեկի հետ շփվելու, ինչը նշանակում է, որ այդ ոլորտում կոռուպցիոն ռիսկերը նվազել են: Նախարարի խոսքերովՙ ոչ ոք չի կարող ասել, որ կոռուպցիա չկա, բայց կառավարության ծրագիրը` երկու-երեք տարվա ընթացքում պետության կողմից մատուցվող ծառայությունների 80 տոկոսը առցանց կամ մեկ պատուհանի միջոցով ստանալու վերաբերյալ, «ակնհայտորեն կոռուպցիոն ռիսկերի նվազման մասին է խոսում»:
Միեւնույն ժամանակ Հրայր Թովմասյանը նշեց, որ մի բան է կոռուպցիայի իրականում նվազումը, մեկ այլ բան` հասարակության ընկալումը, «որտեղ էլ իրականում խնդիրներ կան»: «Կոռուպցիոն ռսիկերը նվազե՞լ են իրավաբանական անձանց գրանցման գործընթացում, այո, նվազել են: Հիմա նույնը կատարվում է զագսում. երեխայի ծննդականը կարող ես ստանալ արդեն ավտոմատ կերպով», ասաց նախարարը: Հրայր Թովմասյանի կարծիքովՙ հայ ժողովուրդը մի առանձնահատկություն ունի` բոլորը բոլորին մեղավոր են համարում, բայց ոչ ոք երբեք իրեն մեղավոր չի համարում:
