Այս վերնագրի ներքո ՍԴՀնչակյան կուսակցության կենտ. վարչությունը հաղորդագրություն է հրապարակել այն մասին, որ նոյեմբերի 7-ին Ստամբուլում համաժողով է տեղի ունեցել թուրքական «Կանաչներ եւ ձախ ապագա» կուսակցության նախաձեռնությամբ եւ Հայոց ցեղասպանությունն ընդունող կազմակերպությունների եւ անհատների մասնակցությամբ, որին հրավիրված է եղել նաեւ Հնչակյան կուսակցությունը: «Պատմության հետ առերեսում» վերնագրի տակ կայացած համաժողովի նպատակն է եղել քննարկել Մեծ եղեռնի 100-ամյակի կապակցությամբ կատարվելիք աշխատանքների եւ ձեռնարկների քննարկումը:
Հաղորդագրությունից կարելի է ենթադրել, որ ավանդական կուսակցությունը ներկայացուցիչ ուղարկելու փոխարեն նամակ է հղել ժողովականներինՙ քաջալերելով նրանց նախաձեռնությունը եւ առաջարկելով համագործակցություն Ցեղասպանության ճանաչման եւ ոգեկոչման գործում:
Հաղորդագրությունը տեղեկացնում է նաեւ, որ համաժողովի մասնակիցները որոշել են հետագայում ձախակողմյան այլ կուսակցությունների հետ առավել ընդլայնված համաժողով գումարել, ընդսմին նաեւ համապատասխան աշխատանք տանել Գերմանիայումՙ տեղի թուրք-ձախակողմյան ուժերի հետ:
Տեղեկանում ենք նաեւ, որ հունիս ամսին թուրքական «Կանաչներ եւ ձախ ապագա» կուսակցությունը Ստամբուլում ոգեկոչել է թուրք-օսմանյան կառավարության կողմից կախաղան բարձրացված հնչակյան 20 նահատակների հիշատակը:
