Նորություններ խորհրդարանում
Ազգային ժողովի ՕԵԿ խմբակցության պատգամավոր Խաչիկ Հարությունյանը երեկ մանդատից հրաժարվելու դիմում էր գրել, այդ մասին հայտարարեց ԱԺ նախագահ Հովիկ Աբրահամյանը ` որպես պատճառ նշելով այլ աշխատանքի անցնելը: Ըստ ՕԵԿ խմբակցության ղեկավար Հեղինե Բիշարյանի` Հայաստանում այժմ կազմավորվում է ՀԱՊԿ ակադեմիա, իսկ Խաչիկ Հարությունյանն էլ լինելու է այդ ակադեմիայի ռեկտորը, հենց սա է այն այլ աշխատանքը, որի պատճառով Խ. Հարությունյանը հրաժարվում է մանդատից: Թե նրա փոխարեն ՕԵԿ-ից ո՞վ կդառնա պատգամավոր` այս կուսակցության քաղխորհրդի որոշումից հետո միայն հայտնի կդառնա:
Մյուս նորությունն այն էր, որ արդեն երկու օր ստորագրահավաք անող ընդդիմադիր պատգամավորները երեկ անհրաժեշտ 44 ստորագրությունը հավաքել էին` ուրբաթ, ժամը 12-ին ԱԺ արտահերթ նիստ հրավիրելու համար, որի թեման է լինելու «Կուտակային կենսաթոշակների մասին» օրենքից կուտակային բաղադրիչի հետաձգումը մեկ տարով (առաջարկվում է այդ բաղադրիչի գործարկումը 2014 թվականի հունվարի 1-ից տեղափոխել 2015 թվականի հունվարի 1-ը, քանի որ բազմաթիվ մտահոգություններ կան բաղադրիչի կիրառմանը տեխնիկապես պատրաստ չլինելու ուղղությամբ): Ստորագրահավաքին մասնակցել են ԲՀԿ-ն, ՀՅԴ-ն, ՀԱԿ-ն ու «Ժառանգությունը», նաեւ` անկախ պատգամավոր Էդմոն Մարուքյանը, Խաչատուր Քոքոբելյանը: Ստորագրող պատգամավորները համոզված են, որ դեռ անպատրաստ ենք կուտակային բաղադրիչը կյանքում ներդնելու, իսկ մեկ տարվա թայմ-աուտը կօգնի գտնելու այն հնարավորությունները, որոնք կմեղմեն նոր օրենքի այս բաղադրիչի հնարավոր բացասական ազդեցությունը թուլացնել: Մեծամասնությունը ստորագրահավաքին չմասնակցեց, բայց քննարկմանը մասնակցելու է:
ԼՂՀ ճանաչման օրինագծի քվեարկությանը խորհրդարանականների մեծամասնությունը չմասնակցեց
ԼՂՀ ճանաչման օրինագիծը երեկ դրվեց քվեարկության` ընդամենը 10 կողմ ձայն հավաքելով: Կողմ են քվեարկել ՀՅԴ-ն ու «Ժառանգությունը», իսկ ՀՀԿ-ն, ՕԵԿ-ը ԲՀԿ-ն, ՀԱԿ-ը բացառիկ միասնականությամբ քվեարկությանը չմասնակցեցին:
Տրիլիոնանոց բյուջե
2014 թվականի բյուջեի նախագծի ուղղվածությունը ԱԺ հանձնաժողովներում բյուջետային նախագծի քննարկումների ժամանակ ներկայացրել ենք, սակայն լիագումար նիստում երեկ սկսված բյուջեի նախագծի քննարկումից թվային պատկերը արժե հիշեցնել: Ֆինանսների նախարար Դավիթ Սարգսյանի ներկայացմամբ` 2014-ին եկամուտների գծով մուտքերը կկազմեն 1 տրլն 134 մլրդ 415 մլն դրամ, ծախսերի գծով` 1 տրլն 244 մլրդ 950 մլն դրամ, դեֆիցիտը նախատեսված է 110 մլրդ 534 մլն դրամ: Հարկային եկամուտները եւ պետական տուրքերը 2014 թվականի համար ծրագրվել են 1 092.3 մլրդ դրամի չափով: Երեկ բյուջեի նախագծի ներկայացումն ավարտվեց, պատգամավորները սկսեցին հարցեր ուղղել կառավարության ներկայացուցչին, հարցերի բնույթը ցույց էր տալիս, որ այսօր երկար ու ծանր քննարկում է սպասվում: Օրինակ` ԱԺ նախագահն, օգտվելով արտահերթ հարց տալու իր իրավունքից, հետաքրքրվում էր, թե ինչ է նշանակում վարչարարության չավելացում, կամ ինչպե՞ս է կրճատվելու ստվերը, կամ` եթե վարչարարությունը չի ավելացվելու, ինչպե՞ս են ապահովվելու բյուջետային մուտքերը: Ըստ ֆինանսների նախարարի` մուտքերը կապահովվեն տնտեսական աճով, գների բարձրացումն է նպաստելու այդ մուտքերին, եւ ապա` վարչարարության այն մեխանիզմները, որոնք ընթացիկ եւ նախորդ տարում ընդունվել են, բայց դեռ լիարժեք չէին գործում, դրանք կգործեն 2014-ին:
Խոսրով Հարությունյանին էլ հետաքրքրում էր` որքա՞ն է նվազելու աղքատությունը նոր բյուջետային տարում: Ըստ Դավիթ Սարգսյանի` բյուջետային ծախսերի ավելացման շնորհիվ աղքատությունը 35,8 տոկոսից 2014-ին կիջնի մինչեւ 32-33 տոկոս:
ԱԺ-կառավարություն հարցուպատասխանից
ԼՂՀ բանակցային գործընթացի, Սարգսյան-Ալիեւ հանդիպումից սպասելիքների, Ստեփանակերտի օդանավակայնի վերաբերյալ պատգամավոր Աղվան Վարդանյանի հարցին պատասխանելով` երեկ Ազգային ժողով-կառավարություն հարցուպատասխանի ընթացքում վարչապետ Տիգրան Սարգսյանը նշեց, թե բացի երկու նախագահների հանդիպման վերաբերյալ տեղեկատվությունից` այլ տեղեկատվության չի տիրապետում: Իսկ ընդհանրապես` հայկական կողմի նպատակն է երկխոսության եւ բանակցային գործընթացի շարունակականություն ապահովել: Տ. Սարգսյանը կարեւոր համարեց Ստեփանակերտի օդանավակայանի շահագործումը զերծ պահել քաղաքական սպեկուլյացիայից, ինչն անում է Ադրբեջանը, ու խնդիրը լուծել առանց լարվածության:
Բավական անբարեհաճ երկխոսություն տեղի ունեցավ Լեւոն Զուրաբյանի եւ ֆինանսների նախարար Դավիթ Սարգսյանի միջեւ. առաջինը հարցնում էր նոր ՀԴՄ-ներից` մի շարք փաստարկներ բերելուց հետո եզրակացնելով, որ 150-200 հազար դրամով գործարարին վաճառվող ՀԴՄ-ն կարելի է 30 դոլարով ձեռք բերել Չինաստանում, մինչդեռ ինչ-որ առեղծվածային հայկական ընկերության հնարավորություն է տրվել 25-30 մլն դոլարի գերշահույթ ստանալ` այդ ՀԴՄ-ները թանկ վաճառելով մեր գործարարներին: Դ. Սարգսյանն էլ հավաստիացնում էր, որ նման առեղծված չկա, ՀԴՄ-ները պետական ՊՈԱԿ է պատվիրել, իմաստն էլ այն է, որ էքսկլյուզիվ տեխնիկական բնութագրիչներով անհնար է դարձվելու կեղծումը միասնական ռեժիմով: Իսկ ՀԴՄ-ների գինն էլ մի շարք ընկերությունների հետ բանակցելուց հետո է ստացվել:
Ու այդտեղ, այդ օրը երկրորդ անգամ Լ. Զուրաբյանը նախարարին ասաց, թե անհեթեթ պատասխան է տալիս: Բայց նախարարին սատար կանգնեց ԱԺ նախագահը` պատգամավորին հորդորելով կառավարության անդամին չվիրավորել:
Արամ Մանուկյանն ու Զարուհի Փոստանջյանն տաքսիստների ուսերին բարդված հարկային բեռի մտահոգությունն էին ուզում հասցնել կառավարությանը, նրանց հարցերին ի պատասխան տրանսպորտի նախարար Գագիկ Բեգլարյանը նշեց, թե ԱԺ-ում կա տաքսիստների հարկային բեռը թեթեւացնելու օրինագիծ: Զ. Փոստանջյանը հակադարձեց, թե այդ նախագծով տաքսիների ոլորտը եւս փորձ է արվում մենաշնորհել, դարձնել անվերահսկելի, որ Գ. Բեգլարյանն այն իրենով անի ու հազարավորր տաքսիներ ներկրի: Գ. Բեգլարյանն էլ զարմացավ` պարզեցնել ոլորտի աշխատանքը նշանակում է մենաշնո՞րհ ստեղծե՞լ:
