ՀԱՐԳԱՆՔԻ ՏՈՒՐՔ ՖՐԱՆՍԻԱՅԻ ՀԱՄԱՐ ԶՈՀՎԱԾ ՀԱՅ ՄԱՐՏԻԿՆԵՐԻՆ

Նոյեմբերի 11-ին, մասնակցելով համաեվրոպական մակարդակով նշվող 1918 թ.-ի զինադադարի հայտարարության 95-ամյակին, Ֆրանսիայի հայ համայնքն իր խոնարհումը մատուցեց Զորավար Անդրանիկի արձանինՙ Փարիզի Պեր Լաշեզի գերեզմանատանը: Քիչ անց տեղի ունեցավ երկրորդ արարողությունը, որի ընթացքում ֆրանսահայերը հարգանք մատուցեցին Ֆրանսիայի Հանրապետության համար զոհված հայ մարտիկների հիշատակին, Փարիզից հաղորդում է լրագրող Ժան Էսքիյանը: Տիկին Ժորժ Պո-Լանգեւենը, կրթական հաջողության գծով կրթության նախարարության ներկայացուցիչը, Ֆրանսիայի անունից ծաղկեփունջ զետեղեց Հայկական հուշարձանի ներքո: Ըստ փաստաթղթային տվյալների, Առաջին համաշխարհային պատերազմում շուրջ 700 հայ մարտիկներ են զոհվել ֆրանսիական ճակատների վրա: