«ՇԻՐԱԿՆ» ԸՆԴՀԱՏԵՑ «ԱՐԱՐԱՏԻ» ԱՆՊԱՐՏԵԼԻ 9 ԽԱՂԵՐԻ ՇԱՐՔԸ
Ֆուտբոլի Հայաստանի բարձրագույն խմբի առաջնության 12-րդ տուրում բավականին հետաքրքրական իրադարձություններ ծավալվեցին, որոնք ավելի սրեցին պայքարը մրցանակային տեղերի համար: Տուրի կենտրոնական խաղը «Հրազդանում» «Արարատի» եւ «Շիրակի» միջեւ կայացած մրցավեճն էր: Երկրի չեմպիոնին հաջողվեց ընդհատել արարատցիների 9 անպարտելի խաղերի շարքն ու 3-0 խոշոր հաշվով հաղթանակ տոնել:
Արդեն 2-րդ րոպեին Դամե Դիոպը գրավեց Ստեփան Ղազարյանի պաշտպանած դարպասը, որը մինչեւ այդ 6 խաղ շարունակ գոլ բաց չէր թողել: Հետագայում Սերժ Դեբլեն եւ Կարեն Մուրադյանն ամրապնդեցին «Շիրակի» հաղթանակը:
Անհաջողության մատնվեց նաեւ «Արարատին» հետապնդող «Փյունիկը»ՙ 0-1 հաշվով զիջելով «Ուլիսին»: Խաղի ելքը վճռեց 63-րդ րոպեին Հակոբ Ղազարյանի խփած միակ գոլը: «Փյունիկը» վերջին 3 խաղերում ընդամենը մեկ միավոր վաստակեցՙ կրելով 2 պարտություն: Թիմի անբավարար ելույթների հետեւանքով «Փյունիկի» գլխավոր մարզիչ Ռաֆայել Նազարյանը պաշտոնանկ արվեց:
Առաջատարների շարքում գտնվող «Գանձասարին» էլ չհաջողվեց միավոր վաստակել: Կապանցիները Երեւանում 1-2 հաշվով զիջեցին «Ալաշկերտին», որն էլ Արմեն Գյուլբուդաղյանցի գլխավորությամբ 2-րդ անընդմեջ հաղթանակը տոնեց: Թիմի հաջողությանը նպաստեցին Գարեգին Մաշումյանի եւ Միհրան Մանասյանի խփած գոլերը: Հյուրերից աչքի ընկավ Հայրապետ Ավագյանը:
Մեծ հետաքրքրությամբ էր սպասվում «Բանանցի» եւ «Միկայի» մրցավեճը: Առաջինը հաջողության հասավ «Միկան» Վարդգես Սաթումյանի գոլի շնորհիվ: Սակայն հետագայում Էդգար Մալաքյանն ու Ռումյան Հովսեփյանը գրավեցին մրցակցի դարպասն ու 2-1 հաշվով կամային հաղթանակ պարգեւեցին «Բանանցին»:
Առաջին շրջանի ավարտական 2 տուրերից առաջ առաջնությունում դադար է հայտարարված, որի ընթացքում Հայաստանի երիտասարդական հավաքականը հյուրընկալվելիս ընտրական 2 հանդիպում կանցկացնի Ֆրանսիայի եւ Բելառուսի իր հասակակիցների հետ:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Արարատ | 12 | 7 | 3 | 2 | 15-7 | 24 |
| 2. Շիրակ | 12 | 5 | 3 | 4 | 21-16 | 18 |
| 3. Փյունիկ | 12 | 4 | 5 | 3 | 21-16 | 17 |
| 4. Գանձասար | 12 | 4 | 4 | 4 | 24-17 | 16 |
| 5. Բանանց | 12 | 3 | 7 | 2 | 10-9 | 16 |
| 6. Միկա | 12 | 3 | 6 | 3 | 13-12 | 15 |
| 7. Ուլիս | 12 | 3 | 3 | 6 | 11-17 | 12 |
| 8. Ալաշկերտ | 12 | 2 | 3 | 7 | 15-36 | 9 |
Ռմբարկուները
| Արտակ Դաշյան | «Գանձասար» | 7 |
| Սերժ Դեբլե | «Շիրակ» | 7 |
| Միհրան Մանասյան | «Ալաշկերտ» | 7 |
| Նարեկ Բեգլարյան | «Գանձասար» | 6 |
