Նոյեմբերի 8-10-ը Մոսկվայում կանցկացվի ըմբշամարտի Եվրոպայի «Ազգերի գավաթի» խաղարկությունը: Մրցակարգի համաձայն, մրցաշարին մասնակցելու են մայրցամաքի 6-ական ուժեղագույն հավաքականները, որոնց թվում են նաեւ Հայաստանի ընտրանիները: Մեր ազատ ոճի ըմբշամարտի հավաքականը մրցավեճի կբռնվի Ռուսաստանի, Վրաստանի, Ուկրաինայի, Թուրքիայի եւ Բուլղարիայի ընտրանիների հետ: Հունահռոմեական ոճի ըմբշամարտի մրցումներին կմասնակցեն Ռուսաստանի, Բուլղարիայի, Ադրբեջանի, Վրաստանի եւ Թուրքիայի հավաքականները:
Ըմբշամարտի Հայաստանի ֆեդերացիայի մարզչական խորհրդի որոշմամբ, Մոսկվայում մեր հավաքականները հանդես կգան երիտասարդական կազմերով: Դա հնարավորություն կտա ստուգելու մեր երիտասարդ ըմբիշների պատրաստվածությունը, տեսնելու նրանց ուժեղ մրցակիցների հետ գոտեմարտերում:
Ազատ ոճի ըմբշամարտի Հայաստանի հավաքականի գլխավոր մարզիչ Արայիկ Բաղդատյանը Մոսկվա ուղեւորվող ըմբիշների թվում ընդգրկել է Վոլոդյա Ֆրանգուլյանին (60 կգ), Սերգեյ Հովսեփյանին (66 կգ), Գրիգոր Գրիգորյանին (74 կգ), Վահե Թամրազյանին (84 կգ), Վիկտոր Կազիշվիլուն (96 կգ) եւ Անդրանիկ Գալստյանին (120 կգ):
Հունահռոմեական ոճի ըմբշամարտի Հայաստանի հավաքականը Մոսկվայում կգլխավորի երիտասարդական հավաքականի գլխավոր մարզիչ Արմեն Բաբալարյանը, որը քաջ ծանոթ է իր սաների հնարավորություններին: Նա Մոսկվայում մրցագորգ կուղեկցի Ռուդիկ Մկրտչյանին (55 կգ), Կարեն Ասլանյանին (60 կգ), Արթուր Մկրտչյանին (66 կգ), Էդուարդ Սարգսյանին (74 կգ), Արգիշտի Աբգարյանին (84 կգ), Սարգիս Տոնոյանին (96 կգ) եւ Վաչիկ Եղիազարյանին (120 կգ):
