Սլովենիայի Լյուբլիանա քաղաքում անցկացված ձյուդոյի երիտասարդների աշխարհի առաջնությանը մասնակցած հայ 6 ձյուդոյիստներից եւ ոչ մեկին չհաջողվեց մրցանակակիր դառնալ: Մինչեւ մրցումների մեկնելը հավաքականը Մարտին Սարգսյանի գլխավորությամբ ուսումնամարզական հավաք էր անցկացրել Աբովյանում:
Մեր ձյուդոյիստներից 4-ին հաջողվեց միայն 2 փուլի արգելքները հաղթահարել: Սլովենիայում 2-ական հաղթանակ տարան ու մեկ պարտություն կրեցին Նարեկ Կարապետյանը (60 կգ), Արսեն Ղազարյանը (66 կգ) եւ Դավիթ Նիկողոսյանը (73 կգ): Մինչեւ 55 կգ քաշային Գարիկ Հարությունյանն առաջին փուլում ազատ էր եւ միայն մեկ հաղթանակ տոնելով, հաջորդ փուլում պարտվեց ու դուրս մնաց հետագա պայքարից: Իսկ ահա Դավիթ Ղազարյանը (66 կգ) եւ Արտավազդ Հովսեփյանը (73 կգ) պայքարից դուրս մնացին առաջին գոտեմարտերում պարտվելով:
