Չափահաս ծխողների թիվը 10 տարում կրճատվել է 1/3-ով
Նյու Յորքի քաղաքային խորհրդի ընդունած օրինագծի համաձայն, շուտով կարգելվի ծխախոտ եւ գլանակներ (այդ թվում էլեկտրոնային) վաճառել 21 տարին չլրացած անձանց: Ընդունված փաստաթուղթը 30 օրվա ընթացքում պետք է ստորագրի քաղաքագլուխ Մայքլ Բլումբերգը, որը հայտնի է որպես հակածխախոտային արշավների կազմակերպիչ:
«Մենք վստահ ենք, որ այս միջոցառումը հսկայական թվով կյանքեր կփրկի», նշել է օրինագծի հեղինակըՙ քաղաքային խորհրդի պատգանավոր Ջեյմս Գեննարոն: ԻՏԱՌ-ՏԱՍՍ գործակալությունը հաղորդում է, որ ներկայումս քաղաքում ծխախոտ կարող են գնել 18 տարին լրացած անձինք. այդ տարիքն է նախատեսված դաշնային օրենսդրությամբ:
Այսպիսով Նյու Յորքը կդառնա տարիքային շեմը 21 տարեկանի բարձրացնող խոշորագույն ամերիկյան քաղաքը: Ներկայումս նման խիստ օրենք գործում է միայն Բոստոնի մոտակայքում գտնվող Նիդեմ քաղաքում (Մասաչուսեթսի նահանգ): Որոշ նահանգներում (Ալաբամա, Ալյասկա, Նյու-Ջերսի, Յուտա եւ այլն) տարիքային ստորին շեմը հասցված է 19 տարեկանի:
Օրինագծի կողմնակիցները հույս ունեն, որ դրա շնորհիվ կնվազի ծխող պատանիների թիվը: Նյու Յորքի առողջապահության վարչության տվյալներով, ծխողների 80 տոկոսը այդ սովորությունը ձեռք է բերել նախքան 21 տարեկան դառնալը:
Ծխախոտ արտադրողներն առարկում են, թե նոր օրենքը երիտասարդներին միայն կստիպի գլանակներ գնել «սեւ շուկայում»: Նրանք նաեւ հայտարարում են, թե իշխանությունները արդեն քվեարկելու եւ բանակում ծառայելու իրավունք ունեցող անձանց չպետք է արգելեն ծխել:
Քաղաքագլուխ Մայքլ Բլումբերգը տարիներ շարունակ պայքարում է հանուն առողջ ապրելակերպի: Նա ծխելն արգելել է բոլոր հասարակական վայրերում եւ նույնիսկ առաջարկել է արգելել գլանակների տեղադրումը խանութների ցուցափեղկերում եւ դրամարկղերի մոտ: Սակայն օրենսդիրները մերժել են այդ առաջարկությունը:
Եթե հավատանք վիճակագրությանը, Բլումբերգի ջանքերը որոշակի արդյունք են տվել. վերջին 10 տարում Նյու Յորքում չափահաս ծխողների թիվը կրճատվել է գրեթե 1/3-ով:
