Արեւելագիտության ինստիտուտի տնօրեն, թուրքագետ Ռուբեն Սաֆրաստյանի դիտարկմամբ` Մերձավոր Արեւելքում տեղի ունեցող զարգացումների առումով որոշակիորեն սրվել են թուրք-ամերիկյան հարաբերությունները: Թուրքիան փորձում է ավելի խորացնել իր ինքնուրույն խաղը Մերձավոր Արեւելքում, ինչը գնալով ավելի շատ դժգոհություններ է առաջացնում Միացյալ Նահանգներում եւ Իսրայելում:
Երեկ լրագրողների հետ հանդիպման ժամանակ Ռուբեն Սաֆրաստյանը նշեց, որ Թուրքիան, փաստորեն, աջակցում է «Ալ Ղաիդային», որպեսզի վերջինս Սիրիան դարձնի իր գործունեության հիմնական կենտրոնը: Սակայն Միացյալ Նահանգները մտահոգված է, որ դա կարող է ուղղվել Արեւմուտքի դեմ: Թուրք-ամերիկյան հարաբերությունների սրման պատճառներից մեկն էլ եղավ Թուրքիայի որոշումը հակաօդային պաշտպանության համակարգերը Չինաստանից գնելու վերաբերյալ: Այս որոշումը ցույց է տալիս, որ Թուրքիան հրաժարվում է նման սպառազինություն գնել ՆԱՏՕ-ի իր դաշնակիցներից:
Անդրադառնալով նաեւ Մաքսային միությանը Թուրքիայի անդամակցության հարցին` բանախոսն ասաց, որ ներկայումս դա անիրատեսական է. «Դա Թուրքիայի խաղի մի մասն է, որը պայմանավորված է ԱՄՆ-ի ու Եվրոմիության հետ հակասություններով»:
