Ֆուտբոլի Հայաստանի մինչեւ 17 տարեկանների պատանեկան հավաքականը Երեւանում անցկացվող Եվրոպայի պատանեկան առաջնության ընտրական մրցաշարի ավարտական խաղում մեծ դժվարությամբ 2-1 հաշվով հաղթեց հետնապահ Ջիբրալթարի ընտրանուն: Արդեն 13-րդ րոպեին Ջորջ Վինկն առաջ մղեց հյուրերին: Միայն 2-րդ խաղակեսում Հովհաննես Իլանգյոզյանին եւ Հովհաննես Փանոսյանին հաջողվեց գրավել մրցակցի դարպասն ու հաղթանակ պարգեւել ՀՀ հավաքականին:
Մեր ընտրանին խմբում գրավեց 3-րդ տեղը ու դուրս մնաց հետագա պայքարից: Հիշեցնենք, որ մեր պատանիները 0-4 հաշվով ջախջախիչ պարտություն էին կրել Անգլիայի հավաքականից, ապա 2 անպատասխան գնդակ էին ընդունել իռլանդացիների հետ խաղում: Խմբի հաղթող դարձան անգլիացիները, որոնք առավելության հասան բոլոր մրցակիցների նկատմամբ: Վերջին խաղում Անգլիայի հավաքականը 6-0 հաշվով ջախջախեց իռլանդացիներին:
