Ժնեւը ցանկություն ունի կանգնեցնել Հայոց ցեղասպանության զոհերի հիշատակին նվիրվածՙ վեճերի առիթ դարձած հուշահամալիրը ՄԱԿ-ին մերձակա Արիանա թանգարանին հարող այգում, ծանուցում է շվեյցարական «Բլիք» լրատուն: Հոկտեմբերի 28 թվագրված հաղորդագրությունից իրազեկ ենք դառնում, որ ի հեճուկս ցանկության, շինարարությունը դեռ չի սկսվել, քանի որ դրա համար արտոնություն դեռեւս չկա: Նախագիծը թուրքերի զայրույթն ու ընդվզումն էր գրգռել: 2005-ին Ժնեւի քաղխորհուրդը 1915-ի զանգվածային կոտորածները որպես ցեղասպանություն է ճանաչել եւ 2008-ին հավանության արժանացրել հուշահամալիրի ճարտարապետական նախագիծըՙ1920-ականների ոճով 9 լապտերներ, որոնցից լամպերի փոխարեն պողպատե արցունքներ են կախված: «15 տարբեր վայրերից ընտրվել է Արիանա թանգարանին հարող զբոսայգին: Հիմա գնդակը Ժնեւի կանտոնի դաշտում է, շինարարության արտոնումը նրանք պիտի որոշեն», sda լրատվական գործակալությանը հաղորդել է Ժնեւ քաղաքի տեղեկատվության պատասխանատուն:
Հուշահամալիրի մասին «Ազգը» ժամանակին տեղեկացրել է: Միջազգային մրցույթում հաղթող էր ճանաչվել ֆրանսահայ արվեստագետ Մելիք Օհանյանի «Հիշողության լապտերներ» նախագիծը:
