Արդեն 4-րդ անգամ իրականացվող դիմակահանդես-շքերթին մասնակցում էին Երեւանի եւ Հայաստանի 6 մարզերի (Արմավիր, Գեղարքունիք, Արարատ, Տավուշ, Կոտայք, Լոռի) շուրջ 500 պատանիներ, ովքեր թափոններից պատրաստված կենդանիների դիմակներով եւ զգեստներով շքերթով անցան Երեւանի փողոցներով` մայրաքաղաքը լցնելով վայրի բնության շնչով: Ինչպես նախորդ տարիներին, այս տարի եւս երթը գլխավորում էր Գերմանիայի Բրեմեն քաղաքից ժամանած «Կոնֆուսաո» խումբը:
Մատենադարանի հարակից հարթակից մեկնարկած շքերթն ամփոփվեց Հյուսիսային պողոտայում` բացօթյա համերգով:
ՎիվաՍել-ՄՏՍ-ի աջակցությամբ իրականացվող դիմակահանդես-շքերթը կոչված է բարձրաձայնելու կենդանիների իրավունքների պաշտպանությանն առնչվող խնդիրների մասին, հատկապես այն կենդանատեսակների, որոնք վտանգված են կամ գտնվում են անհետացման եզրին: Շքերթը նաեւ յուրօրինակ մրցույթ է: Մասնակից 25 խմբերը (որից 7-ը` երաժշտական) մրցում են 3 անվանակարգերում` լավագույն բնապահպանական զգեստ, լավագույն ստեղծագործական լուծում, լավագույն երաժշտական խումբ: Մրցույթի արդյունքները կամփոփվեն 2014 թ. փետրվարին: Թափոններին երկրորդ կյանք տված 18 խմբերն այս տարի ներկայացնում էին 14 տարբեր կենդանատեսականեր:
Արդեն ավանդական դարձած շքերթն իրականացնում է Վայրի բնության եւ մշակութային արժեքների պահպանման հիմնադրամը`(FPWC) գլխավոր գործընկեր ՎիվաՍել-ՄՏՍ-ի հետ համատեղ: Լինելով սոցիալապես պատասխանատու ընկերություն` ՎիվաՍել-ՄՏՍ-ը շրջակա միջավայրի պահպանությանն ուղղված հանրային իրազեկումը համարում է իր առաքելության մի մասը: Ընկերությունը մշատապես աջակցում եւ իր մասնակցությունն է ցուցաբերում FPWC-ի նախաձեռնություններին:
