ՀԵՍՍԵՆԻ ԵՐԿՐԱՄԱՍՈՒՄ ՆՇՎԵՑ ՀՀ ԱՆԿԱԽՈՒԹՅԱՆ ՏՈՆԸ

Ան. Հ., Գերմանիա

ՀՀ անկախության 22-ամյակին նվիրված միջոցառումը Գերմանիայում մի փոքր ուշ է նշվելՙ սեպտեմբերի 22-ին ԳԴՀ զբաղված էր Բունդեսթագի, որոշ երկրամասերումՙ նաեւ տեղական ընտրություններով: Ինչպես իրազեկ ենք դառնում Հեսսենի երկրամասի մարզային «Բյուրշթեդթեր ցայթունգի» հոկտեմբերի 19-ի համարից, Բերգշտրասսե մարզում այն նշվել է հոկտեմբերի 18-ին ՀՀ պատվո հյուպատոս Սթիվեն Բրայան Ֆերայի ջանքերով: «Ազգ»-ում ժամանակին իրազեկել ենք, որ ԳԴՀ-ում ՀՀ-ն այժմ երկրորդ պատվո հյուպատոսն ունիՙ հեփփենհայմցի գործարար դոկտոր Ֆերան 2012-ի հոկտեմբերից Մայնի Ֆրանկֆուրտում ՀՀ պատվո հյուպատոսի պարտականություններն է կատարում: Անկախության տոնի առթիվ կազմակերպված հանդիսությանը պաշտոնապես Հայաստանը ներկայացրել եւ ելույթ է ունեցել է ԱԺ պատգամավոր Վահան Հովհաննիսյանը, որն իր երկրի քաղաքական շահերը նաեւ եվրոպական խորհրդարանում է պաշտպանում, գրում է թերթը: (Բեռլինում ՀՀ դեսպանի տեղը թափուր է Արմեն Մարտիրոսյանի սեպտեմբերի վերջին Երեւան վերադարձից հետո, ԶԼՄ-ները հաղորդում են այդ պաշտոնում Վահան Հովհաննիսյանի նշանակման մասին – Ան. Հ.): Ըստ գերմանական լրատուի, Հովհաննիսյանն անդրադարձել է իր երկրի հուզիչ պատմությանը, համերգային մասում ելույթ է ունեցել հեփփենհայմցի վիրտուոզ երգեհոնահար Ֆրանց Լամբերթը, իսկ ԳԴՀ-ում Վրաստանի դեսպան Գաբրիելա ֆոն Հաբսբուրգը տոնահանդեսի առթիվ հավաքված հանրությանը Հայաստանի մասին սեփական տպավորություններն է փոխանցել: Տեղական իշխանությունների ներկայացուցիչ Մաթթիաս Վիլկեսը, որ առիթ է ունեցել դոկ. Ֆերայի ընկերակցությամբ լինել Հայաստանում, իր եզրափակիչ խոսքում անդրադարձել է Հայոց ցեղասպանությանը, հատկապես շեշտելով, թե թուրքական իշխանությունները պատահածը դեռ չեն վերանայել, եւ ինքն իր լիազորությունների սահմաններում սատարելու է Հայաստանին: Գերմանական լրատուն փոխանցում է նաեւ, թե «առաջիկա շաբաթ Հեփփենհայմում սպասվում է Լեռնային Ղարաբաղի Հանրապետության վարչապետ Արա Հարությունյանի ելույթը»: