Գյումրիում ավարտվել է ԱՊՀ մշակութային մայրաքաղաքի շրջանակներում անցկացված «Կենարար աղբյուր» խորագրով քանդակագործության միջազգային սիմպոզիումը: Վերջինիս ղեկավար Արթուր Գեւորգյանը կատարված մեկամսյա ստեղծագործական աշխատանքի արդյունքներն է ամփոփել Ժուռնալիստների «Ապարեզ» ակումբում հրավիրած մամուլի ասուլիսում:
Սիմպոզիումի ընթացքում հինգ երկրների մեկ տասնյակ քանդակագործների կողմից ստեղծվել է 10 քանդակ: Այժմ ծրագրված է ստեղծել քանդակների բացօթյա թանգարան, ներառելով քաղաքում նախորդ տարիներից առկա նաեւ այլ գործեր եւ դրանց խնամքը: Ա. Գեւորգյանի տեղեկացմամբ, ներկա քանդակներից 8-ը կտեղադրվեն նշված թանգարանի համար ընտրված Հաղթանակի պուրակի սկզբնական հատվածումՙ Խաղաղության օղակում, մյուս 2-ըՙ քաղաքային ծննդատան բակում: Եթե եղանակային պայմանները չխանգարեն, թանգարանի բացումը տեղի է ունենալու մշակութային մայրաքաղաքի ծրագրի եզրափակման օրըՙ նոյեմբերի կեսին: Մինչ այդ պուրակի խնամքի ու բարեկարգման աշխատանքներ պետք է կատարվեն:
Ինչ մնում է քանդակագործական սիմպոզիումի հետ կապված ապագա ծրագրերին, նշվել է, որ ֆինանսական աջակցություն լինելու դեպքում կազմակերպիչները մտադիր են սիմպոզիումը դարձնել շարունակական, բայց արդենՙ ոչ միջազգային, այլ հանրապետական կամ քաղաքային ընդգրկմամբ:
