Հոկտեմբերի 15-ին Բուենոս Այրեսի «Նասիոնալ» թատրոնը լեփ-լեցուն էր: Տոմսերը վաճառվել էին նշված ամսաթվից դեռ շատ առաջ: Բեմում նորից Բուենոս Այրեսի Արգենտինահայ մշակութային միության հայկական ժողովրդական ու ազգագրական պարերի «Գայանե» պարախումբն էր, որ ճանաչվել է որպես Արգենտինայի մշակութային արժեք եւ գրանցվել որպես Հայկական պարերի արգենտինյան ընկերություն:
Ինչպես միշտ, ելույթը փայլուն էր ու ամեն պարից հետո դահլիճը երկարատեւ ծափահարություններով իր հիացմունքն ու խրախուսանքն էր արտահայտում, քաջալերելով սիրելի պարախմբին:
Այս տարի պարախմբի մշտական հանդիսատեսների փորձված աչքր նկատեց թե աղջիկների եւ թե տղաների խմբում հայտնված նորեկներին: Այո, պարախմբում նոր, երիտասարդ պարողներ են հայտնվել: Նրանցից ոմանք «Գայանեի» մանկական խմբից են, որ աճել են, հասակ նետել ու միացել հիմնական խմբին, սակայն կան նաեւ երիտասարդներ, որ նախկինում շատ անգամներ են հիացել խմբի ելույթներով ու ի վերջո հայ պարի կշռույթն արթնացել է նրանց արյան մեջ: Որոշել են միանալ «Գայանեին»: Նրանք ընդամենը մի քանի ամիս առաջ են միացել խմբին, սակայն մեծ պատասխանատվության զգացում են ցուցաբերել փորձերի րնթացքում ու բեմի վրա բնավ չէր նկատվում նրանց անփորձությունը: Այսպիսով «Գայանեն» այս տարի ավելի երիտասարդ էր ու դեռ բացահայտվելու ներուժ ունի:
Նորանոր հաջողություններ ու նորանոր բեմեր ցանկանք սիրելի պարախմբին:
