Գեորգի Մարղվելաշվիլիՙ «Վրացական երազանք» կուսակցությունից, Դավիթ Բագրաձեՙ «Վրացական ազգային շարժում»-ից, Նինո Բուրջանաձեՙ «Ժողովրդավարական շարժումՙ հանուն միասնական Վրաստանի» շարժման ղեկավար, Շալթա Նաթելաշվիլիՙ «Լեյբորիստական» կուսակցության նախագահ: Վրաստանի նախագահական ընտրություններին առաջադրված 23 թեկնածուներից միայն վերոնշյալ չորսն են հանդիպել հայ համայնքի ներկայացուցիչների հետ եւ ներկայացրել նախընտրական ծրագիր:
Սակայն Վրաստանում ազգային փոքրամասնություններին տրված խոստումները երեկ բնութագրեց ՀՀԿ պատգամավոր, «Ջավախք» հայրենակցական միության նախագահ Շիրակ Թորոսյանը:
«Այնպիսի խոստումներ, ինչպիսիք հետաքրքրում են ազգային փոքրամասնություններին, չեն հնչեցվել: Խոստումները հիմնականում վերաբերել են սոցիալ-տնտեսական հարցերին: Իսկ ինչ վերաբերում է ազգային փոքրամասնությունների լեզվին, կրթական կամ հոգեւոր ոլորտին, գրեթե անտեսվել են: Բոլորը թեկնածուները կարծիք են հայտնել, որ վրացերենը պետք է հարգվի, եւ երկրում ապրող ազգային բոլոր փոքրամասնությունները պետք է տիրապետեն լեզվին», ասաց Թորոսյանըՙ հավելելով, որ լեզվի հետ կապված հարցը ընդունելի է բոլորի, նաեւ հայ համայնքի համար:
Պատգամավորի ներկայացմամբՙ Վրաստանն էլ պարտավոր է հարգել ազգային փոքրամասնությունների լեզվի, ազգային ինքնության պահպանման իրավունքները: Այս հարցի վերաբերյալ թեկնածուները մակերեսորեն են խոսել, միայն հավելել են, որ Վրաստանը պետք է հարգի ազգային փոքրամասնությունների լեզուն, սակայն կոնկրետ առաջարկներ չեն հնչել:
Թորոսյանի գնահատմամբՙ առաջիկա նախագահական ընտրություններին վրացահայությունը պետք է ընտրություն կատարիՙ ելնելով թեկնածուների նախկին գործունեությունից եւ խոստումներից:
«Հայությունն առանձնապես շահագրգռված չէ, որ քվեարկի Սաակաշվիլիի թեկնածուի օգտինՙ ելնելով նրա վարած քաղաքականությունից:
«Սաակաշվիլին շատ հաճախ է աչքի ընկնել հայահալած քաղաքականությամբ: Իմ կարծիքովՙ հայության մի ստվար զանգված իր ձայնը կտա վարչապետ Բիձինա Իվանիշվիլիի ղեկավարած կուսակցության թեկնածուիՙ Գեորգի Մարղվելաշվիլիի օգտին»:
Միաժամանակ Թորոսյանը հիշեցրեց, որ «Վրացական երազանքը» մեկ տարի առաջ բազմաթիվ խոստումներ էր տվել, սակայն դրանց մեծ մասն անկատար է մնացել, մի մասն էլ մասամբ է իրականացվել:
