Լոռու մարզի Թումանյանի շրջանի Դսեղ գյուղից 2 կմ հյուսիս-արեւելք` Դեբետի աջ վտակ Մարց գետակի ձախակողմյան ձորալանջի փոքրիկ հարթակի վրա գտնվող Սուրբ Գրիգոր Բարձրաքաշ վանական համալիրը ներառվել է 2014 թ. «Հուշարձանների համաշխարհային դիտանցման» ցանկի մեջ:
«Հուշարձանների համաշխարհային դիտանցումը» հուշարձանների համաշխարհային հիմնադրամի պահպանության առաջնային ծրագրերից է, որի նպատակն է միջազգային հանրության ուշադրության կենտրոնում պահել մշակութային ժառանգության վայրերում հանդիպող մարտահրավերները: 1996 թ. ի վեր երկու տարին մեկ անգամ հիմնադրամը բարձրաձայնում է առավել վտանգված մշակութային ժառանգության մասին: Ցանկի մեջ ներգրավվելը հնարավորություն է ընձեռում ներկայացնել տեղանքը ոչ միայն տեղական, այլեւ միջազգային մակարդակով: 2014 թ. ցանկը ներառում է 67 հուշարձան 47 երկրից, որոնցից յուրաքանչյուրը վկայությունն է մարդկային բարձրագույն կամքի եւ մշակութային բազմազանության ժամանակակից հրաշալիքներից մինչեւ հնագույն քաղաքակրթություններ, հեռավոր բնակավայրեր եւ խորհրդանիշ հանդիսացող տեղական հուշարձաններ:
Իսկ հուշարձանների համաշխարհային հիմնադրամը տեղանքների ընտրությունը պաշտոնապես հայտարարել է հոկտեմբերի 8-ին Նյու Յորքում կայացած կոնֆերանսի ընթացքում:
