Չեխիայի հայ առաքելական եկեղեցու ծխական խորհուրդ,
«Ապրիլ 24-ի» հանձնախումբ,
«Արմենիա ակումբ» կազմակերպություն,
«Ուրարտու» հայ-չեխական ընկերություն,
Պրահայի շաբաթօրյա դպրոցի տնօրենություն,
«Օրեր» եվրոպական ամսագրի խմբագրակազմ, 22.10.2013, Պրահա
Հոկտեմբերի 18-ին, ինչպես նաեւ հոկտեմբերի 22-ին Հայաստանի եւ սփյուռքի լրատվամիջոցներին Սլովակիայի Բրատիսլավա քաղաքում գործող ԵՀՄՖ մամլո քարտուղարությունից մի հաղորդագրություն է ուղարկվել, որում իրականությանը չհամապատասխանող մեկնաբանություններ են գրված Չեխիայի հայ համայնքի, Հայաստանի դեսպանության եւ վերջիններիս գործունեության մասին:
Ինչպես այդ կազմակերպության ղեկավար Աշոտ Գրիգորյանը, այնպես էլ իր կողքին կանգնած նորելուկները, ովքեր որեւէ գործ չեն արել Չեխիայի հայկական համայնքներում, ցավոք, անտեսում են, որ 20 տարի շարունակ այս համայնքում կազմակերպվել եւ ամենաբարձր մակարդակով անցկացվել են տարբեր քաղաքական, մշակութային, հոգեւոր եւ այլ հասարակական միջոցառումներ: «Չեխիայի հայ համայնք» անվանումով գրանցված կազմակերպություն չի եղել , բայց գործել են եւ գործում են գրանցված տարբեր կազմակերպություններ, այդ թվումՙ «Ապրիլ 24-ի» հանձնախումբը, որը կազմակերպել է բազմաթիվ միջոցառումներՙ իր աշխատանքներում ներառելով նաեւ Չեխիայի ամենատարբեր քաղաքներում բնակվող մեր հայրենակիցներին: Այս տարի գրանցվել է նաեւ Հայ առաքելական եկեղեցու ծխական համայնք, ընտրվել է ծխական խորհուրդ, որն էլ համակարգում է համայնքային կյանքը (մշակութային, հոգեւոր, կրթական եւ այլ ուղղություններով), պարբերաբար քննարկումներ է անցկացնում եւ նախապատրաստում է ժողով: Կատարված աշխատանքը երբեք չենք գովազդել, բայց դժվար չէ թերթել «Օրեր» եվրոպական ամսագրի արխիվը կամ սփյուռքի նախարարության տեղեկագրի էջերը եւ տեսնել, թե այս փոքրաթիվ համայնքում ինչպիսի աշխատանքներ են կատարվել անցած տարիների ընթացքում: Բավական է հիշատակել միայն Հայոց ցեղասպանությանը նվիրված մեծ գիտաժողովը Չեխիայի Սենատումՙ երջանկահիշատակ նախագահ Վացլավ Հավելի հովանու ներքո, Հայաստանի երկրաշարժի 20-ամյա տարելիցին նվիրված մեծ երեկոն Չեխիայի Սենատում, սենատոր Յարոմիր Շտետինայի այդ թեմայով գրված պիեսի բեմականացումը, Կարել Հանսայի «Արեւելքի սարսափները» հայտնի գրքի չեխերեն վերահրատարակումը, Յիհլավայում առաջին հայկական խաչքարի տեղադրումը, Վիլյամ Սարոյանի 100-ամյակի նշումըՙ Հայաստանի եւ ԱՄՆ դեսպանությունների հետ համատեղ, Ղարաբաղյան շարժման 25-ամյակին եւ սումգայիթյան ջարդերի 25-ամյա տարելիցին նվիրված սեմինար-երեկոն Չեխիայի խորհրդարանումՙ համագործակցությամբ պատգամավորների պալատի ներկայացուցիչների հետ, Լիդիցեում «Խոջալու» անունով փողոցի բացման կասեցումը, հրեական «9 դարպաս» փառատոնին եւ ցեղասպանությունների դատապարտմանը նվիրված գիտաժողովին մասնակցությունը, բազմաթիվ այլ հանրային, մշակութային ու քաղաքական միջոցառումներ, որոնց մի զգալի մասին մասնակցել է նաեւ ՀՀ դեսպանությունը: 17 տարի գործում է հայկական շաբաթօրյա դպրոցը, որը վերածվել է համայնքային յուրօրինակ կենտրոնի:
Ինչ վերաբերում է Հայաստանի դեսպանության հետ կապերին, ապա պետք է նշենք, որ համայնք-դեսպանություն հարաբերությունները դեսպանատան բացումից հետո մտել են նորՙ որակապես ավելի կառուցողական փուլ, եւ մեր համատեղ աշխատանքը տալիս է իր դրական պտուղները:
Չեխիայի հայկական համայնքի ներկայացուցիչները միշտ համագործակցել են եւ կապի մեջ են եղել Եվրոպայի հայկական տարբեր կազմակերպությունների, այդ թվումՙ ԵՀՄՖ-ի հետ, եւ զարմանալի է, որ այս կազմակերպության ղեկավարությունը, քաջ գիտենալով մեր համայնքի ներուժը եւ կատարած հսկայական աշխատանքը, հանդես է գալիս նման ապատեղեկատվությամբ:
Մեզ անհայտ է, թե հեռահար ինչ նպատակ է հետապնդում ԵՀՄՖ-ի հաղորդագրությունը, սակայն պարզ է, որ որեւէ մեկին չի հաջողվի սեպ խրել Չեխիայի հայկական համայնքներում եւ համայնք-դեսպանություն հարաբերություններում:
Հետայսու կոչ ենք անում մեր գործընկերներինՙ չտրվել ԵՀՄՖ-ից ստացվող ապակողմնորոշիչ հաղորդագրություններին եւ Չեխիայի հայ համայնքի մասին լրատվությունը ճշտել չեխահայ համայնքի լիազորված կազմակերպությունների եւ անհատների հետ: Մեզ համար անընդունելի է բամբասանքի ու ստի վրա հիմնված լրատվության տարածումը:
Հարգանքովՙ
Չեխիայի հայկական կազմակերպություններ.
Հ.Գ. – Ովքեր ցանկություն ունեն ծանոթանալու համայնքի միայն վերջին տարիների գործունեությանը, կարող են այցելել orer.eu կայքէջ, եւ «Հայերը Չեխիայում» բաժնում ծանոթանալ իրականացված աշխատանքներին:
