Հունաստանում ընթացող շախմատի եվրոպական գավաթների խաղարկության 2-րդ տուրում «Միկայի» մրցակիցը հաղթողի գլխավոր հավակնորդ Մոնտե Կառլոյի թիմն էր: Ցավոք «Միկան» 1,5-2,5 հաշվով պարտվեց: Վճռորոշ եղավ Էլինա Դանիելյանի պարտիան Աննա Մուզիչուկի հետ, որում հայ շախմատիստուհին զիջեց մրցակցուհուն: Մյուս պարտիաներն ավարտվեցին ոչ-ոքի: Հաշտություն կնքեցին հնդիկ շախմատիստուհի Հարիկա Դրոնավալին եւ աշխարհի ներկայիս չեմպիոնուհի Հոու Յիֆանը, Լիլիթ Մկրտչյանն ու Համպի Կոներուն, Լելա Ջավախիշվիլին եւ Պիա Կրամլինգը:
Այս պարտությունից հետո «Միկան» 2 միավորով նահանջեց 6-րդ հորիզոնական: Աղյուսակը 4-ական միավորով գլխավորում են Մոնտե Կառլոյի թիմն ու Ռուսաստանի «Յուգրան»: Վերջինս 2,5-1,5 հաշվով հաղթեց «Պոլիտեխնիկային»: 3-րդ տուրում առաջատարները կմրցեն միմյանց հետ: «Միկայի» մրցակիցը կլինի «Ջելիկա ՊԵՊ-ը»:
Տղամարդկանց մրցաշարում Սանկտ Պետերբուրգի թիմը 2-րդ հաղթանակը տոնեցՙ 6-0 հաշվով ջախջախելով Ժնեւի «Էչեցին»: Այդ մրցախաղում Սերգեյ Մովսիսյանին հանգիստ էր տրամադրվել: Սանկտ Պետերբուրգի թիմը 4 միավորով 2-րդ տեղում է: Բոլոր պարտիաներում վաստակած միավորների քանակով (11,5) սանկտպետերբուրգցիները կես միավորով են հետ մնում աղյուսակը գլխավորող «Մալախիտից», որը 2-րդ տուրում էլ 6-0 հաշվով հաղթեց «Նորդեային»:
