Աբրահամ Խաշմանյանը նշանակվել է ֆուտբոլի Հայաստանի երիտասարդական հավաքականի գլխավոր մարզիչ: Նա այդ պաշտոնում կփոխարինի Ռաֆայել Նազարյանին: Խաշմանյանին կօգնեն Արման Տոնոյանը, Աշոտ Գրիգորյանը եւ Արման Կիրակոսյանը, որոնք նրա հետ աշխատում են նաեւ «Արարատում»:
Հիշեցնենք, որ Աբրահամ Խաշմանյանը բացի «Արարատից», գլխավորում էր նաեւ մինչեւ 19 տարեկանների Հայաստանի պատանեկան հավաքականը, որը վերջերս Լեհաստանում անցկացված Եվրոպայի առաջնության ընտրական մրցաշարում շատ մոտ էր հաջորդ փուլի ուղեգրի նվաճմանը:
Ինչ վերաբերում է Ռաֆայել Նազարյանին, ապա նրա գլխավորությամբ մեր երիտասարդական հավաքականն անհաջող է հանդես գալիս ընտրական մրցաշարում: Անցկացրած 4 հանդիպումներից 3-ում մեր ֆուտբոլիստները պարտվել են, տոնել են մեկ հաղթանակ: Մեր ընտրանին 4 տուրից հետո վաստակած 3 միավորով ընտրական 10-րդ խմբում նախավերջինՙ 4-րդ տեղում է: Այնպես որ Աբրահամ Խաշմանյանին դժվարին աշխատանք է սպասում երիտասարդական հավաքականում: Սակայն նրա մարզչական գիտելիքներն իրենց արդյունքն արդեն տվել են «Արարատում», որը ներկայումս Հայաստանի առաջնության առաջատարն է:
Աբրահամ Խաշմանյանը երիտասարդական հավաքականի գլխավոր մարզչի պաշտոնում նորամուտը կնշի նոյեմբերի 14-ին: Այդ օրը մեր հավաքականը կհյուրընկալվի խմբի առաջատար Ֆրանսիայի ընտրանուն, որը վերջերս Երեւանում հաղթել էր 4-1 հաշվով: Իսկ նոյեմբերի 19-ին մեր երիտասարդ ֆուտբոլիստները մրցակցի հարկի տակ կմրցեն բելառուսների հետ:
