Հոկտեմբերի 18-ին «Արմենիա-Մարիոթ» հյուրանոցի «Տիգրան Մեծ» սրահում կայացել է «Օրրանի» 8-րդ ամենամյա բարեգործական ընթրիքը: Միջոցառման նպատակը հանրության ուշադրությունը սոցիալական ծանր կացության մեջ հայտնված ընտանիքների խնդիրների վրա կենտրոնացնելն ու դրամական նոր միջոցներ հայթայթել էր:
Օրվա բանախոսներն են եղել «Օրրանի» նվիրատու եւ տնօրենների խորհրդի ֆինանսական խորհրդատու` Գրիգոր Գրիգորյանը եւ ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, ով իր ուղերձում նշել է. «Մեզանից յուրաքանչյուրը հավանաբար երբեւէ փորձել է սահմանել երջանկության բանաձեւը: Ու թեեւ երեւույթների ընկալումը յուրովի է, ակնհայտ է, որ մանկան ժպիտը երջանկություն է յուրաքանչյուրի համար»:
Միջոցառման հյուրերը մասնակցել են հետաքրքրկան ժամանցային ծրագրով հագեցած ընթրիքին, թանկարժեք մրցանակներով վիճակախաղին, արվեստի եզակի գործերի կենդանի աճուրդին, ինչպես նաեւ «Օրրանի» սաների ձեռքի աշխատանքների ցուցահանդես-վաճառքին:
Երեկոյի ընթացքում մասնակիցները կատարել են իրենց ներդրումը` որոշակի պատասխանատվություն ստանձնելով «Օրրանի» կենտրոններ հաճախող յուրաքանչյուր երեխայի սննդի, կրթության, մշակութային եւ բազմակողմանի զարգացմանն հարցում:
«Օրրան» բարեգործական ՀԿ-ն հիմնադրվել է 2000 թվականին` երեխաների եւ ծերերի շրջանում աղքատության եւ մուրացկանության տարածումը կանխելու առաքելությամբ: «Օրրանի» երեւանյան եւ վանաձորյան կենտրոններում ամեն օր շուրջ 200 երեխա եւ 60 տարեց օգտվում են ամենօրյա սննդի, առողջապահական, սոցիալական, կրթական, մշակութային համալիր ծառայություններից:
ՎիվաՍել-ՄՏՍ-ն ողջունում է իր առջեւ չափազանց բարդ խնդիր դրած եւ համարձակ լուծումներ առաջարկող կազմակերպության նախաձեռնությունները եւ պատրաստակամորեն շարունակում է աջակցել դրանց: Ընկերությունն արդեն տեւական ժամանակ իր մասնակցություն է ցուցաբերում «Օրրանի» ծրագրերին: Մասնավորապես` Բաց հասարակության ինստիտուտի օժանդակության հիմնադրամի եւ ՎիվաՍել-ՄՏՍ-ի հովանավորությամբ 2009թ. հոկտեմբերին հիմնադրվել է «Օրրանի» վանաձորյան մասնաճյուղը:
2011 թ. բարեգործական ընթրիքի ընթացքում ՎիվաՍել-ՄՏՍ-ը նվիրաբերեց ավելի քան 40 մլն դրամ:
«Օրրանի» 7-րդ ամենամյա բարեգործական ընթրիքի ընթացքում Հայաստանում հեռահաղորդակցության առաջատար օպերատորը հասարակական կազմակերպությանը փոխանցել էր 90 միլիոն դրամ:
«Օրրան»-ի այս տարվա հանգանակությունը կազմեց մոտ 94 միլիոն դրամ, որից 55 միլիոնը նվիրաբերել է ՎիվաՍել ՄՏՍ-ն:
