Ինչպես տեղեկացվել է, հոկտեմբերի 14-ին Սիրիայում կանգնեցվել է Հիսուս Քրիստոսիՙ Հայաստանում ձուլված 39 մետրանոց արձանը: «Ես եկել եմ փրկելու աշխարհը» կոչվող հսկա քանդակը տեղադրվել է Սեյդնայա քաղաքից ոչ հեռու գտնվող Քերովբեների բարձունքում, Կոստանդնուպոլսից Երուսաղեմ տանող ուխտագնացության պատմական ուղու վրա եւ տեսանելի է չորս երկրներիցՙ Լիբանանից, Իսրայելից, Հորդանանից ու Պաղեստինից:
Պատերազմող երկրում, այն էլ նման վայրում այս արձանի տեղադրումը լուրջ խորհուրդ ունի, եւ պատահական չէ, որ տեղադրման համար պահանջված երեք օրերի ընթացքում հակամարտող կողմերն այդ հատվածում ռազմական գործողությունները դադարեցրած են եղել:
Անցած շաբաթվա վերջին մի շարք լրատվամիջոցներ, այդ թվումՙ մեր թերթը, հաղորդելով այս լուրը, տեղեկացրել էին նաեւ, թե ով էր այս ձեռնարկը նախաձեռնողը, սակայն չէին նշել քանդակի հեղինակի անունը:
Հեղինակը, ինչպես շատ շուտ պարզվեց, գյումրեցի քանդակագործ Արտուշ Պապոյանն է: Դեռ 2011 թվականին նա առաջարկություն է ստացել կազմակերպիչներից եւ երկար մտորումներից հետո իր երեք որդիների հետ ձեռնամուխ եղել, 1 տարի 4 ամսում կերտել քանդակային կոմպոզիցիան: Նրանում Քրիստոսի կողքին Ադամի եւ Եվայի արձաններն են, իսկ Հիսուսի ոտքերի տակ օձն է, որի միջոցով քանդակագործը պատկերել է սատանային եւ Քրիստոսի հաղթանակը նրա նկատմամբ: Պատվիրատուների ցանկությամբՙ մինչեւ Սիրիա տեղափոխումը արձանի մասին չի բարձրաձայնվել:
