Սիրիացի ընդդիմադիրների Ազգային կոալիցիան հրապարակել է իր պահանջները, որոնք «կարող են երաշխավորել» Սիրիայի իրադրության կարգավորմանն ուղղված «Ժնեւ-2» հաշտության կոնֆերանսի անցկացման հաջողությունը: Հակակառավարական ուժերը հայտարարել են, որ իրենք Ժնեւ չեն մեկնի, եթե բանակցություններում իբրեւ միջնորդ հանդես գա «Սիրիայի թշնամի եւ զավթիչ» Իրանը: Այդ մասին հաղորդում է «Ալ Արաբիա» հեռուստաալիքը, վկայակոչելով Ազգային կոալիցիայի ղեկավար Ահմեդ Ջարբայի հայտարարությունը:
Բացի դրանից, ընդդիմությունը նախագահ Բաշար Ասադին պաշտպանող լիբանանյան «Հզբոլլահ» շարժման կողմնակիցներին կոչ է արել հեռանալ Սիրիայից:
Ջարբայի խոսքերով, եթե ընդդիմադիրները ստանան այդ երաշխիքները, ապա Ազգային կոալիցիան անմիջականորեն որոշում կընդունի հաշտության կոնֆերանսին մասնակցելու վերաբերյալ:
Ջարբան հերթական անգամ հրաժարվել է «Ասադի վարչակարգի հետ երկխոսությունից» եւ կրկնել է ընդդիմության կոչըՙ Ասադը պետք է թողնի պետության ղեկավարի պաշտոնը:
Իր հերթին նախագահ Բաշար Ասադը գերմանական «Շպիգել» շաբաթահանդեսին տված հարցազրույցում նշել է այն պայմանները, որոնց առկայության դեպքում ինքը պատրաստ կլինի «Ժնեւ-2» կոնֆերանսում բանակցել ընդդիմության հետ: Նրա խոսքերով, բանակցելուց առաջ ապստամբները պարտավոր են դադարեցնել մարտական գործողությունները եւ վայր դնել զենքը:
