ԱՆՆԱ ՄԱՐՏԻՐՈՍՅԱՆ, ՀՊՄՀ գիտական գրադարանի ավագ գրադարանավար
Գրադարանը պետության սոցիալական, տնտեսական բարեկեցությունն է, ուր կուտակվում եւ տարածվում են գիտելիքները: Մարդկային հոգեկան աշխարհի շարժումը կախված է գրքերից, առանց որի ներդրված նյութական եւ հոգեկան կյանքի կառուցվածքը անիմաստ կլիներ: Գրքերով է պայմանավորված կողմնորոշումը կյանքի գլխավոր ճանապարհներին, այստեղ էլ պայմանավորվում է հասարակության կուլտուրան գիտելիքների հավաքագրումով, իր մեջ կուտակելով հիմքային, գիտակցական կենսափորձ:
Ժամանակակից գրադարանավարի պարտքն է ապագա սերնդի հանդեպ պահպանել եւ զարգացնել գրքային մշակույթը եւ զերծ մնալ համացանցում տեղադրված երբեմն անհիմն, սուտ ինֆորմացիաներից:
Մանկավարժական համալսարանի գիտական գրադարանը համաքայլ է ժամանակի հետ` ունենալով իր ուրույն տեղը համալսարանական մշակութային շինարարության մեջ:
Այսօր մանկավարժական համալսարանի գրադարանը ներկայանում է որպես գիտական եւ մշակութային լաբորատորիա, ամբիոն` ուսանողների, գիտական աշխատողների եւ դասախոսների համար:
Մանկավարժական համալսարանի գիտական գրադարանն ունի իր գերխնդիրը, այն է` սպառիչ տեղեկատվությամբ օժանդակել կրթական գործընթացին, որտեղ էլ կարեւորվում են գրքային ֆոնդերի` ուսումնական բազմաբնույթ եւ մեծաքանակ գրականությամբ ապահովումը:
ՀՊՄՀ գիտական գրադարանի 630.000 միավոր գրականությունը լիովին բավարարում է գրքապահովվածության սահմանված պահանջը: Առանձնապես մեծ է ամսագրերի, հանդեսների եւ պարբերականների` որպես թարմ տեղեկատուների պահանջարկը, թարմ տեղեկատվություն է նաեւ ՄԱԿ-ից ստացված գրականությունը:
Գրադարանը կազմավորվելով Մանկավարժական համալսարանի հետ գրեթե միաժամանակ, անցնելով ինքնահաստատման եւ կատարելագործման դժվարին ուղին, դարձել է բուհի կարեւորագույն օղակներից մեկը, եւ այսօր անհնար է պատկերացնել բուհական գործունեությունը` առանց գրական-տեղեկատվական այդ ամուր հենարանի:
Վերջին շրջանում համալսարանում տեղի ունեցող փոփոխություններից անմասն չի մնացել նաեւ գրադարանը: Այժմ գրադարանը դրված է առաջանցիկ զարգացման հիմքերի վրա, որն առաջադրել է նոր հնարավորությունները` դուրս գալու տարիներ շարունակ պարտադրված կաղապարից, եւ բռնել զարգացման առավել արդիական ուղին: Լուծվեցին այնպիսի խնդիրներ, ինչպիսիք էին ֆոնդերի շարունակական համալրումը ծրագրային եւ գիտական մեծ պահանջարկ ունեցող գրականությամբ, նյութատեխնիկական վերազինումը` միջազգային չափանիշներով, գրադարանային գործի նոր մեթոդների կիրառումը, գիտատեխնիկական ներուժի ներդրումը, բանիմաց գրադարանավարների սպասարկման կուլտուրայի բարձրացումը:
Մասնագիտական տոնի առթիվ ցանկանում եմ շնորհավորել իմ գործընկերներին, որոնք լցված են լավատեսությամբ, կատարում են մեծ ու բարի գործ, չեն զլանում նոր նախաձեռնություններ իրականացնել` օգտագործելով իրենց հարուստ գիտելիքները եւ ընձեռնվող բոլոր հնարավորությունները:
Մաղթում եմ բոլոր գրադարանավարներին աշխատանքային եւ անձնական հաջողություներ:
