ՎԱՐԴԱՆ ՄԻՆԱՍՅԱՆԸ ՀՐԱՊԱՐԱԿԵՑ ԱԶԳԱՅԻՆ ՀԱՎԱՔԱԿԱՆԻ ԿԱԶՄԸ

Ֆուտբոլի Հայաստանի ազգային հավաքականի գլխավոր մարզիչ Վարդան Մինասյանը հրապարակել է այն ֆուտբոլիստների ցանկը, որոնք կնախապատրաստվեն հոկտեմբերի 11-ին Բուլղարիայի եւ հոկտեմբերի 15-ին Իտալիայի հավաքականների հետ կայանալիք աշխարհի առաջնության ընտրական մրցախաղերին:

Հայաստանի հավաքականն աշխարհի առաջնության ընտրական վերջին հանդիպումների նախապատրաստությունը կսկսի հոկտեմբերի 7-իցՙ մարզումներն անցկացնելով Ավանի ֆուտբոլի ակադեմիայի խաղադաշտում:

Վնասվածքից ապաքինվելուց հետո կրկին հավաքական է հրավիրվել փորձառու պաշտպան Վալերի Ալեքսանյանը: Որոշ ընդմիջումից հետո հավաքականի կազմում ընդգրկվել է Էդգար Մալաքյանը, որը ներկայումս «Բանանցում» արդյունավետ խաղ է ցուցադրում: Հավաքի է հրավիրվել նաեւ ՀՀ առաջնության լավագույն ռմբարկուների ցուցակը գլխավորող Արտակ Դաշյանը:

Ինչպես հայտնի է, հոկտեմբերի 10-ին Հայաստանի երիտասարդական հավաքականը Երեւանում ընտրական մրցախաղում մրցելու է Ֆրանսիայի ընտրանու հետ: Այդ հանդիպումից հետո երիտասարդական հավաքականի մի քանի խաղացողներ կմիանան ազգային հավաքականին: Նշենք, որ որակազրկման պատճառով բուլղարացիների հետ հանդիպմանը չեն մասնակցի Վարազդատ Հարոյանն ու Արթուր Եդիգարյանը:

Հայաստանի հավաքականը հոկտեմբերի 14-ին կմեկնի Իտալիա, որտեղ հաջորդ օրը Նեապոլի «Սան Պաոլո» մարզադաշտում ընտրական վերջին հանդիպումը կանցկացնի իտալացիների հետ:

Ահա թե ովքեր են հրավիրվել ազգային հավաքականի ուսումնամարզական հավաքին:

Դարպասապահներՙ Ռոման Բերեզովսկի («Դինամո» Մ., Ռուսաստան), Գեւորգ Կասպարով («Զոբ Ահան», Իրան), պաշտպաններՙ Ռոբերտ Արզումանյան («Ակտոբե», Ղազախստան), Հրայր Մկոյան («Գանձասար»), Վալերի Ալեքսանյան («Ռահ Ահան», Իրան), Վարազդատ Հարոյան («Փյունիկ»), Կամո Հովհաննիսյան («Փյունիկ»), Լեւոն Հայրապետյան («Վիձեւ», Լեհաստան), Արթուր Ավագյան («Գանձասար»), կիսապաշտպաններՙ Կառլեն Մկրտչյան («Անժի», Ռուսաստան), Արթուր Եդիգարյան («Կայրաթ», Ղազախստան), Հենրիխ Մխիթարյան («Բորուսիա», Դորտմունդ, Գերմանիա), Դավիթ Մանոյան («Փյունիկ»), Գեւորգ Ղազարյան («Շախտյոր», Կարագանդա, Ղազախստան), Մարկոս Պիզելի («Կրասնոդար», Ռուսաստան), Արաս Օզբիլիս («Սպարտակ», Մ., Ռուսաստան), Մասիս Ոսկանյան («Ռոսելար», Բելգիա), Էդգար Մալաքյան («Բանանց»), Արտակ Դաշյան («Գանձասար»), hարձակվողներ` Յուրա Մովսիսյան («Սպարտակ», Մ., Ռուսաստան), Արթուր Սարկիսով («Ուրալ», Ռուսաստան):