Բրիտանական օրերի մեկամսյակի շրջանակներում հոկտեմբերի 2-9-ը հայտնի բրիտանացի կինովավերագրող Շոն Մաքալիսթերը Երեւանում կներկայացնի «Britain is…» ֆիլմի հետահայաց ցուցադրությունը:
Կինովավերագրողը երեկ, լրագրողների հետ հանդիպմանն ընդգծեց, որ շատ է լսել Հայաստանի մասին եւ բազմիցս եղել է Հալեպի հայկական թաղամասերում ու շատ է սիրում տեղի խոհանոցը:
Ներկայացնելով իր «Սիրիական սիրո պատմությունը» ֆիլմի նախագիծը, կինովավերագրողն ասաց, որ ֆիլմը պատմում է մի սիրիացու մասին, որը պայքարի է ելել բանտում գտնվող իր կնոջ ազատության համար:
Նշենք, որ բրիտանական «Սանդենս» կինոփառատոնի մրցանակակիր Շոն Մաքալիսթերը 1996 թվականին ավարտել է Բրիտանիայի ազգային կինոդպրոցը: Նրա ֆիլմերի հիմնական ուղղվածությունն է Միջին Արեւելքի թեժ կետերում բնակվող մարդկանց կյանքի եւ հոգսերի արտացոլումը: Մաքալիսթերը համագործակցում է հանրահայտ բրիտանական BBC հեռուստաալիքի հետ: Նա ֆիլմեր է նկարահանել Իրաքում, Եմենում, Իսրայելում եւ այլ արեւելյան երկրներում:
Հատկանշական է, որ Բրիտանիայի օրերի շրջանակներում տեղի կունենան համերգներ, ֆիլմերի ցուցադրություններ եւ թատերական բեմադրություններ, կանցկացվեն սեմինարներ: Հայաստան կայցելի Թոնի Բլերի լրատվամիջոցների գծով նախկին խորհրդական Լենս Փրայսը, որը կհանդիպի քաղաքական ուժերի, թերթերի խմբագիրների ու քաղաքացիական հասարակության ներկայացուցիչների հետ:
