Վաշինգտոնից Ամերիկայի հայ ազգային (Հայ դատի) կոմիտեի հաղորդագրությունը տեղեկացնում է, որ Մ. Նահանգների Սենատի մեծամասնական խմբակցության առաջնորդի տեղակալ Ռիչարդ Դուրբինը (դեմոկրատ Իլինոյսից) սեպտեմբերի 25-ին Սենատի քննարկմանն է ներկայացրել մի օրինագիծ, որով պահանջում է շտապ կարգով դադարեցնել անտառահատումները Հայաստանում ու Հայիթիում եւ այդ երկրներում գտնվող անտառները հասցնել իրենց բնականՙ նախաիննսունական թվերի վիճակին: Օրինագիծը նախատեսում է բարելավել անտառների կառավարումը, խթանել համագործակցությունը երկու երկրների համապատասխան նախարարությունների եւ առանձին կազմակերպությունների միջեւ, մշակել կարճաժամկետ եւ երկարաժամկետ կատարողական ծրագրեր անտառների հետագա պահպանումը ամուր հիմքերի վրա դնելու համար:
Ենթադրվում է «մեր պարտքը բնությանը» նշանաբանի ներքո ստեղծել ոչ կառավարական մի հանձնախումբ, որը բանակցություններ կվարի երկու երկրների կառավարությունների եւ միջազգային վարկատու կազմակերպությունների հետՙ բարելավելու անտառածածկ տարածքների վիճակը Հայաստանում եւ Հայիթիում:
Հայ դատի կոմիտեն ողջունել է Դուրբինի նախաձեռնությունը:
