ՀՀ հավաքականի հարձակվող Յուրա Մովսիսյանը ՌԴ առաջնությունում 5-րդ գոլը խփեցՙ աչքի ընկնելով 10-րդ տուրում «Կրասնոդարի» հետ անցկացրած խաղում, որում «Սպարտակը» 3-2 հաշվով դժվարին հաղթանակ տոնեց: Մովսիսյանն աչքի ընկավ 27-րդ րոպեինՙ հաշիվը դարձնելով 2-1:
Հատկանշական է, որ իր նախկին թիմի դարպասը խփած գոլը Յուրա Մովսիսյանը չնշեց: Խաղից հետո նա այսպես է մեկնաբանել իր քայլը. «Շատ եմ հարգում «Կրասնոդարին» եւ չեմ ցանկանում ուրախությունս ցույց տալ, երբ տխրեցնում եմ նախկին ակումբիս: «Կրասնոդարի» սեփականատեր Սերգեյ Գալիցկու հետ խաղից հետո հանդիպեցի մարզադաշտում, շատ ջերմ զրուցեցինք: Մոսկվայում եւս զգում եմ նրա աջակցությունը»:
Ի դեպ, Գալիցկինն ոտնկայս ծափահարել էր Մովսիսյանին, երբ նա գրավել էր «Կրասնոդարի» դարպասը: Այս խաղում Մովսիսյանը փոխարինվեց 73-րդ րոպեին, իսկ Արաս Օզբիլիսը, որ նախորդ տուրում բացել էր գոլերի հաշիվը, մնաց պահեստայինների նստարանին: «Սպարտակի» գլխավոր մարզիչ Վալերի Կարպինն այսպես է բացատրել Օզբիլիսի բացակայությունը. «Օզբիլիսը ոչ միայն «Սպարտակում» է շատ խաղացել, այլեւ Հայաստանի ազգային հավաքականում: Նա թունավորվել էր, քիչ էր մնացել կոմայի մեջ հայտնվեր, սակայն հավաքականից վերադարձավ թիմ եւ 90 րոպե ծանր մրցախաղ անցկացրեց ԲԿՄԱ-ի հետՙ բացելով հաշիվը: Ուստի այսօր նրան հանգստանալու հնարավորություն ընձեռեցինք, հաշվի առնելով նաեւ, որ առջեւում «Զենիթի» հետ հանդիպումն է»:
Այս հաղթանակից հետո «Սպարտակը» 23 միավորով «Զենիթի» հետ գլխավորում է մրցաշարային աղյուսակը: 21 միավոր ունի ԲԿՄԱ-ն, որը գոլազուրկ ոչ-ոքի խաղաց «Անժիի» հետ: Վերջինիս կազմում խաղադաշտ դուրս չեկավ Կառլեն Մկրտչյանը:
