ՍՈՆԱ ԱՐԱՄՅԱՆ
Մանկավարժական պետական համալսարանի 1-ին կուրսի շուրջ 1600 ուսանողներ ավանդույթի համաձայն այս տարի եւս մեծ լուսավորիչ Խաչատուր Աբովյանի տուն-թանգարանի բակում երդվեցին հավատարիմ մնալ ուսուցչի վեհ մասնագիտությանն ու կոչմանը:
Ապագա մանկավարժներին շնորհավորեց եւ օրհնության խոսք հղեց Մայր աթոռ Սուրբ Էջմիածնի Քիրստոնեական դաստիարակության կենտրոնի տնօրեն, հոգեշնորհ հայր Վարդան վարդապետ Նավասարդյանը ` փոխանցելով Ամենայն հայոց կաթողիկոս Գարեգին Երկրորդի օրհնանքի խոսքը: «Մանկավարժությունը մարդուն բարոյական, իմացական արժեքների մեջ հաստատելու, վերահաստատելու եւ վերաիմաստավորելու մեծ առաքելություն է: Որպես նորանկախ պատմության կերտողներ եւ հայ եկեղեցու ժառանգորդներ` առողջ գիտակցությամբ պետք է կարողանանք առնել առավելագույնը եւ տալ առավելագույնը ապագային»,- ասաց Վարդան վարդապետը:
Ուսանողներին շնորհավորեց համալսարանի ռեկտոր Ռուբեն Միրզախանյանը : «Դուք ընդունվել եք համալսարան, դարձել ուսանող, դա իսկական հաղթանակ է: Մանկավարժական համալսարանը ներկայումս ապրում է բավականին լուրջ ու պատասխանատու փոփոխությունների եւ զարգացման ժամանակահատված: Թող լուսավոր լինի ձեր ուղին ուսուցչի պատասխանատու եւ անհրաժեշտ գործունեության մեջ»,- մաղթեց ռեկտորը: Նա խոստացավ անել ամեն ինչ, որ տարիներ անց ուսանողները հպարտությամբ արձանագրեն, որ հենց Մանկավարժական համալսարանի շրջանավարտներն են:
Ապագա մանկավարժներին բարեմաղթանքի խոսք հղեց նաեւ Ֆինլանդիայի Օուլուի համալսարանի մանկավարժական կրթության ֆակուլտետի դեկան Ռիտա-Լիզա Կորկեամակին : Խոսելով Հայկական պետական մանկավարժական եւ Օուլուի համալսարանների համագործակցության մասին` Կորկեամակին նշեց. «Դուք առաջին ծիծեռնակներն եք, որ պիտի տեսնեք ու զգաք մեր համագործակցության արդյունքները: Համագործակցության երկու տարիների ընթացքում մենք համոզվեցինք, որ դուք շատ տաղանդավոր եւ առանձնահատուկ ազգ եք, եւ ձեզ համար կրթության դերը առանձնահատուկ նշանակություն ու կարեւորություն ունի»:
Մասնագիտական կրթության եւ կիրառական մանկավարժության ամբիոնի դոկտոր Շողիկ Ոսկանյանը , կարեւորելով օրվա խորհուրդը, ասաց. «Դուք պետք է դառնաք նորօրյա բարեփոխված դպրոցի հույսն ու ապավենը, ինչպես նաեւ ապագան ու կենսունակությունը: Դարեր շարունակ հայ ժողովուրդը եղել եւ գոյաբանել է դպրոցի, կրթության եւ դաստիարակության շնորհիվ: Մնացեք շիտակ ու վեհ, եղեք ազնիվ ու բարի, եւ ձեզանով ավելացրեք այս երկրի բարին ու գեղեցիկը: Հետամուտ եղեք բոլոր այն լուսավոր ու վեհ գաղափարներին, որի կրողն ու սերունդներին փոխանցողը լինելու եք դուք»: Իսկ վերջում, ուսանողներին հղելով Խրիմյան Հայրիկի պատգամը, ավելացրեց` արեւի պես նայեք աշխարհին, քանզի կրթությունն ու դաստիարակությունն են կերտում մարդկությունը, դաստիարակում հային եւ մարդուն:
Սեպտեմբերյան այս մեծ եւ հիշարժան տոնակատարությանը առաջինկուրսեցիներին ողջունեցին նաեւ ՀՀ ժողովրդական արտիստ Ջիվան Գասպարյանն ու Մանկավարժական համալսարանի շրջանավարտ, ամբիոնի վարիչ, ՀՀ վաստակավոր արտիստ Արա Գեւորգյանը :
Միջոցառումը ամփոփվեց գեղեցիկ համերգային ծրագրով:
