Թուրքիայում ընթացող շախմատի մինչեւ 20 տարեկանների աշխարհի առաջնության վերջնագծում վերելքով է խաղում Սամվել Տեր-Սահակյանը, որը տուրից տուր բարելավում է ցուցանիշները: 10-րդ տուրում Սամվելը նոր հաղթանակ տոնեց լեհ Յան-Կրժիժտոֆ Դուդայի նկատմամբ եւ վաստակած 7,5 միավորով պերուացի Յորգ Կորիի հետ բաժանում է 3-4-րդ տեղերը: Հայ շախմատիստը 3-րդ անընդմեջ հաղթանակը տոնեց եւ ընդհուպ մոտեցավ առաջատարներին: Նա ընդամենը մեկ միավոր է զիջում չինացի Յու Յանիին եւ Թուրքիան ներկայացնող Ալեքսանդր Իպատովին: Ի դեպ, հաջորդ տուրում Սամվելը սեւերով խաղալու է Իպատովի հետ: Այդ պարտիայի արդյունքից շատ բանով պայմանավորված կլինի մեդալների վերջնական բաշխումը: Իսկ մրցաշարի ավարտին մնացել է ընդամենը 3 տուր:
Վահե Բաղդասարյանը կրկին անհաջողության մատնվեցՙ պարտվելով Գաբրիել Գաեհվիլերին: Վահեն 4,5 միավորով 70-րդ տեղում է:
Կանանց մրցաշարում Մարիա Գեւորգյանը 6 միավորով 24-րդ տեղում է: Մարիան հաղթեց վիետնամցի Պհունգ Վո Տի Կիմին: Աղյուսակը 8 միավորով գլխավորում է Իրինա Բուլմագան, որը հաշտություն կնքեց Ալեքսանդրա Գորյաչկինայի հետ: Վերջինս Դեյսի Կորիի հետ 7,5 միավորով հետապնդում է առաջատարին:
