«Նապոլիի» նախագահը «Բորուսիային» նմանեցրել է եռագլուխ վիշապին
Գերմանական «Բիլդ» հանդեսի անցկացրած հարցման արդյունքներով «Համբուրգի» դարպասը Հենրիխ Մխիթարյանի խփած գոլը ճանաչվել է լավագույնը բունդեսլիգայի առաջնության 5-րդ տուրում: Հարցման մասնակիցների 37 տոկոսն իր ձայնը տվել է Մխիթարյանին: Հիշեցնենք, որ Մխիթարյանը մինչ այդ դարձել էր 4-րդ տուրի լավագույն գոլի հեղինակ եւ ընդգրկվել էր խորհրդանշական հավաքականում:
«Նապոլիի» նախագահ Աուրելիո Դե Լաուրենտիսը «Բորուսիայի» հետ չեմպիոնների լիգայի խմբային մրցաշարի մեկնարկային խաղից առաջ մրցակցին համեմատել է երեքգլխանի վիշապի հետ. «Շատ եմ զգուշանում «Բորուսիայից»: Այն յուրօրինակ երեքգլխանի վիշապ է: «Բորուսիան» հիանալի թիմ է, որը կոմբինացիոն ֆուտբոլ է ցուցադրում: Երկար ժամանակ հետեւում եմ թիմի ելույթներին: Վստահ եմ, որ մեզ բարդ հանդիպում է սպասվում: Հետաքրքրական կլինի հետեւել Կլոպ-Բենիտես մարզչական դիմակայությանը»:
Ըստ գերմանական «Բիլդ» հանդեսի, երեքգլխանի վիշապը «Բորուսիայի» մարզիչ Յուրգեն Կլոպը, ՀՀ հավաքականի կիսապաշտպան Հենրիխ Մխիթարյանն ու Լեհաստանի հավաքականի հարձակվող Ռոբերտ Լեւանդովսկին են:
