ԻՏԱԼԻԱՆ ԵՎ ՀՈԼԱՆԴԻԱՆ ԱՇԽԱՐՀԻ ԱՌԱՋՆՈՒԹՅԱՆ ՄԱՍՆԱԿԻՑՆԵՐ
Ֆուտբոլի աշխարհի առաջնության ընտրական մրցաշարի եվրոպական գոտում կայացած մրցախաղերից հետո հայտնի դարձան Եվրոպայից եզրափակիչ փուլի ուղեգիր նվաճած առաջին 2 հավաքականները: Աշխարհի առաջնությունում իրենց մասնակցությունն ապահովեցին Իտալիայի եւ Հոլանդիայի հավաքականները:
Իտալացիները B խմբում սեփական հարկի տակ 2-1 հաշվով հաղթեցին չեխերին եւ 20 միավորով անհասանելի դարձան մրցակիցների համար: Ի դեպ, այդ խաղից հետո չեխերի գլխավոր մարզիչ Միխալ Բիլեկը հրաժարական տվեցՙ հայտարարելով, որ չի կատարել իր առջեւ դրված խնդիրը: Բիլեկը Չեխիայի հավաքականը գլխավորում էր վերջին 4 տարիներին:
B խմբում 2-րդ տեղի համար պայքարը կշարունակեն Բուլղարիայի եւ Դանիայի հավաքականները: Բուլղարացիները Մալթայում 2-1 հաշվով հաղթելով տանտերերին, վաստակեցին 13 միավոր: Դանիան 1 միավոր պակաս ունի: Հոկտեմբերի 11-ին Բուլղարիան հյուրընկալվելու է Երեւանում, իսկ 4 օր անց սեփական հարկի տակ մրցելու է չեխերի հետ: Դանիայի ընտրանին իտալացիներին եւ Մալթայի հավաքականին ընդունելու է սեփական հարկի տակ: Իսկ ՀՀ հավաքականը կորցրեց 2-րդ տեղի համար պայքարը շարունակելու վերջին հնարավորությունը:
Աշխարհի առաջնության 2-րդ մասնակիցը որոշվեց Անդորրայում, որտեղ հոլանդացիները 2 անպատասխան գնդակ խփեցին դաշտի տերերի դարպասը: Հոլանդիայի հավաքականը հիանալի ցուցանիշ ունիՙ 8 խաղում 22 միավոր:
2-րդ տեղի համար պայքարում առայժմ առջեւում է Հունգարիայի հավաքականը, որը 5-1 հաշվով սեփական հարկի տակ ջախջախեց էստոնացիներին: Մյուս խաղում Ռումինիայի հավաքականը սեփական հարկի տակ 0-2 հաշվով պարտվեց թուրքերին:
A խմբում վերջնական հաջողությանը մոտ է Բելգիայի հավաքականը, որն ունի 22 միավոր: 2-րդ տեղում ընթացող խորվաթները վաստակել են 17 միավոր: Խմբում կայացած 2 հանդիպումներում գրանցվեցին այսպիսի արդյունքներ. Մակեդոնիա-Շոտլանդիաՙ 1-2, Ուելս-Սերբիաՙ 0-3:
C խմբում էլ Գերմանիայի հավաքականն է գործնականում ապահովել ուղեգիրը: Հերթական հաղթանակը տոնելով Ֆարերների նկատմամբ (3-0), գերմանացիները վաստակեցին 22 միավոր: 2-րդ տեղում ընթացող շվեդները հյուրընկալվելիս պարտության մատնելով ղազախներին (1-0), ունեն 17 միավոր: Ավստրիան 1-0 հաշվով հաղթելով իռլանդացիներին, վաստակեց 14 միավոր:
Մյուս խմբերում համառ պայքար է ծավալվել ուղեգրերի համար: G խմբում 19-ական միավորով առաջատարներն են Բոսնիայի եւ Հունաստանի հավաքականները, որոնք էլ կվիճարկեն ուղեգիրը: Հույները հաղթեցին լատվիացիներին (1-0), Բոսնիան պարտության մատնեց սլովակներին (2-1):
Ռուսաստանի հավաքականը Սանկտ Պետերբուրգում 3-1 հաշվով հաղթելով իսրայելցիներին, վաստակեց 18 միավոր ու շրջանցեց պորտուգալացիներինՙ գլխավորելով F խմբի մրցաշարային աղյուսակը: Այս խմբում անակնկալ մատուցեց Լյուքսեմբուրգի հավաքականը, որը 3-2 հաշվով հաղթեց Հս. Իռլանդիային: Լյուքսեմբուրգը 6 միավոր վաստակեց ու տեղափոխվեց 5-րդ հորիզոնականՙ հետնապահի տեղը զիջելով ադրբեջանցիներին: Իսկ հյուսիսիռլանդացիների 74-ամյա գլխավոր մարզիչ Ջովանի Տրապատոնին պաշտոնանկ արվեց:
H խմբում կայացած 2 առաջատարներիՙ Ուկրաինայի եւ Անգլիայի հավաքականների մրցավեճում դարպասներն անառիկ մնացին: Դա միակ գոլազուրկ ոչ-ոքին էր ընտրական մրցաշարի 8-րդ տուրում: Անգլիան մեկ միավորով գերազանցում է ուկրաինացիներինՙ գլխավորելով աղյուսակը:
Տուրի մյուս հանդիպումներում գրանցվեցին այսպիսի արդյունքներ. Նորվեգիա-Շվեյցարիաՙ 0-2, Իսլանդիա-Ալբանիաՙ 2-1, Կիպրոս-Սլովենիաՙ 0-2, Սան Մարինո-Լեհաստանՙ 1-5, Բելառուս-Ֆրանսիաՙ 2-4, Վրաստան-Ֆինլանդիաՙ 0-1:
Մրցաշարային աղյուսակ
B խումբ
| Խ | Հ | Ո | Պ | Գ | Մ | |
| 1. Իտալիա | 8 | 6 | 2 | 0 | 15-5 | 20 |
| 2. Բուլղարիա | 8 | 3 | 4 | 1 | 13-6 | 13 |
| 3. Դանիա | 8 | 3 | 3 | 2 | 9-10 | 12 |
| 4. Չեխիա | 8 | 2 | 3 | 3 | 8-8 | 9 |
| 5. Հայաստան | 8 | 3 | 0 | 5 | 8-10 | 9 |
| 6. Մալթա | 8 | 1 | 0 | 7 | 4-18 | 3 |
