Ֆուտբոլի Հայաստանի բարձրագույն խմբի առաջնության 4-րդ տուրից հետո մրցաշարում երկիշխանություն հաստատվեց: 2-1 հաշվով հաղթելով «Ալաշկերտին», «Միկան» միավորներով հավասարվեց «Փյունիկին»: Արդեն 7-րդ րոպեին անկյունայինի խաղարկումից հետո Գեւորգ Պողոսյանը բացեց հաշիվըՙ առաջ մղելով «Միկային»: 78-րդ րոպեին Վարդան Պետրոսյանին հաջողվեց վերականգնել հավասարակշռությունը, սակայն մեկ րոպե անց Վարդգես Սաթումյանը խփեց հաղթական գնդակը:
Մեծ հետաքրքրությամբ էր սպասվում «Փյունիկի» եւ «Բանանցի» մրցավեճը, որում մարտական ոչ-ոքի (2-2) գրանցվեց: 12-րդ րոպեին նախկին փյունիկցի Էդգար Մալաքյանը 11 մ հարվածով բացեց հաշիվը: 3 րոպե անց փյունիկցի Գագիկ Պողոսյանը վերականգնեց հավասարակշռությունը: 2-րդ խաղակեսում «Բանանցի» նորեկ, սլովակ պաշտպան Լուբոշ Հանզեն առաջ մղեց իր թիմինՙ բացելով գոլերի հաշիվը ՀՀ առաջնություններում: «Փյունիկին» պարտությունից փրկեց 17-ամյա Նարեկ Ասլանյանը, որը խաղավարտից 8 րոպե առաջ վերականգնեց հավասարակշռությունը:
Աստիճանաբար իր խաղը վերագտնում է երկրի չեմպիոն «Շիրակը», որն առաջնությունում խոշոր հաշվով առաջին հաղթանակը տոնեց: «Շիրակը» 3-0 հաշվով առավելության հասավ մեկնարկում անհաջող խաղացող «Ուլիսի» նկատմամբ: 3 գոլերն էլ խփեցին թիմի լեգեոնականները: 9-րդ րոպեին հաշիվը բացեց Բորիս Կադիո Դիդիեն, իսկ խաղավերջում ընդամենը մեկ րոպեում Սերժ Դեբլեն 2 անգամ գրավեց «Ուլիսի» դարպասը:
«Արարատի» կենսագրությունում նշանակալի իրադարձություն տեղի ունեցավ: Թիմը խփեց բարձրագույն խմբում հոբելյանականՙ 1000-րդ գնդակը: Գոլի հեղինակն «Արարատի» պաշտպան Նորայր Գրիգորյանն էր, որը 16-րդ րոպեին գլխի հարվածով գրավեց Արսեն Բեգլարյանի պաշտպանած դարպասը: Մինչեւ ընդմիջման գնալը սերբ հարձակվող Ալեքսանդր Ռակիչը 2-րդ գնդակն ուղարկեց «Գանձասարի» դարպասը:
Ընդմիջումից հետո թեեւ Դեյան Վուկոմանովիչը կրճատեց հաշիվը, սակայն Ալեքսանդր Ռակիչը կրկին վերականգնեց 2 գնդակի տարբերությունը: Ավելացված ժամանակում գանձասարցի Նարեկ Բեգլարյանը արձանագրեց հանդիպման վերջնական հաշիվըՙ 3-2: «Արարատը» 2-րդ անընդմեջ հաղթանակը տոնելով, բարելավեց մրցաշարային գործերը:
4-րդ տուրից հետո առաջնությունում դադար է հայտարարված, որի ընթացքում Հայաստանի ազգային հավաքականը 2 ընտրական մրցախաղ կանցկացնի Չեխիայի եւ Դանիայի ընտրանիների հետ:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 4 | 2 | 2 | 0 | 9-6 | 8 |
| 2. Միկա | 4 | 2 | 2 | 0 | 5-3 | 8 |
| 3. Շիրակ | 4 | 2 | 1 | 1 | 8-5 | 7 |
| 4. Արարատ | 4 | 2 | 1 | 1 | 4-3 | 7 |
| 5. Բանանց | 4 | 1 | 2 | 1 | 5-5 | 5 |
| 6. Գանձասար | 4 | 1 | 1 | 2 | 8-9 | 4 |
| 7. Ալաշկերտ | 4 | 0 | 2 | 2 | 4-7 | 2 |
| 8. Ուլիս | 4 | 0 | 1 | 3 | 2-7 | 1 |
Ռմբարկուները
| Արտակ Դաշյան | «Գանձասար» | 5 |
| Սերժ Դեբլե | «Շիրակ» | 3 |
| Դավիթ Մանոյան | «Փյունիկ» | 2 |
| Սարգիս Բալոյան | «Փյունիկ» | 2 |
| Անրդանիկ Բարիկյան | «Շիրակ» | 2 |
| Ալեքս | «Միկա» | 2 |
| Ալեքսանդր Ռակիչ | «Արարատ» | 2 |
| Դիդիե Կադիո | «Շիրակ» | 2 |
