Կրթության ազգային ինստիտուտի փոխտնօրեն Անահիտ Բախշյանը կարծում է, որ դպրոցական դասագրքեր կազմելու գործընթացին ուսուցիչները պետք է ավելի ակտիվ մասնակցեն:
Երեկ «Հենարան» ակումբում Անահիտ Բախշյանը տեղեկացրեց, որ կրթության ու գիտության նախարարի` 2012-ի նոյեմբերի հրամանով այս տարի հրատարակվող բոլոր դասագրքերը պետք է անցնեին փորձարկում 90 դպրոցներում, սակայն 90 դպրոցներից միայն 12-ն են նորմալ կարծիք հայտնել դասագրքերի վերաբերյալ:
Ըստ Անահիտ Բախշյանի` ուսուցիչները դժգոհում են դասագրքերի որակից, սակայն դրանք կազմելու ժամանակ նույն ուսուցիչները պասիվ են, եւ դպրոցներում դասագրքերի փորձարկումը շատ վատ է կատարվել: Նույնիսկ որոշ առարկաների դասագրքերի տակ տնօրենները երկու տողով են եզրակացություն թողել գրեթե առանց ուսումնասիրելու դասագրքերը: «Ընդհանրապես դասագրքերի ստեղծման համակարգն այսօր իրեն արդեն սպառել է: Մեր երկրում դասագրքաստեղծման գործընթացն արմատապես պետք է փոխվի», հավելեց տիկին Բախշյանը:
Իսկ «Մխիթար Սեբաստացի» կրթահամալիրի տնօրեն Աշոտ Բլեյանը նշեց, որ դասագրքերին ու տետրերին պետք է այլընտրանք դառնա համակարգիչը, եւ «Մխիթար Սեբաստացի» կրթահամալիրում աշակերտներն այսուհետեւ դասերին հաճախելու են նեթբուքներով ու նոթբուքներով: Աշոտ Բլեյանը կողմնակից է ուսումնական գործընթացներում նորագույն տեխնոլոգիաների ներդրմանը, քանի որ շնորհիվ դրանց ուսուցիչն ինքն է դառնում արդեն դասի բովանդակության ստեղծողը. «Իսկ եթե նրան տալիս եք դասագիրքը, ապա ուսուցիչը դառնում է զուտ դրա սպառողը»: Նույնիսկ կրթահամալիրում կիրառվող դասագրքերի տպագրմանը, ըստ Աշոտ Բլեյանի, իրենց ուսուցիչներն ունեն մասնակցություն, բայց քանի որ ներսում իրականացվում է հեղինակային կրթական ծրագիր, ապա դասագրքերից օգտվում են միայն աշակերտների ցանկության դեպքում:
Իսկ երեկվանից սկսած 5-6 տարեկանից մինչեւ ավագ դպրոցում սովորողները եւ ուսուցիչները «Մխիթար Սեբաստացի» հաճախելու են անձնական համակարգիչներով: Ի դեպ, ինտերնետով էլ ապահովված են Հայաստանի բոլոր դպրոցները: Անահիտ Բախշյանը տեղեկացնում է, որ պետությունը բավականին շատ միջոցներ է դրել, որ ինտերնետ ունենան բոլոր դպրոցները:
Լրագրողներից մեկի հարցին` արդյոք աշակերտները պատրա՞ստ են սովորելու համակարգիչներով, թե՞ կօգտագործեն դրանք խաղերի համար, Անահիտ Բախշյանը պատասխանեց, որ նոթբուքները խաղերի համար օգտագործում են անգամ Ազգային ժողովի պատգամավորները…
Աշակերտների անձնական օգտագործման նեթբուքների ու նոթբուքների համար պետք է վճարեն ծնողները, այսինքն` կրթահամալիրը դրանք չի տրամադրում անվճար: Աշոտ Բլեյանն ասում է, որ պայմանագիր են կնքել «Արդշինինվեստ» բանկի հետ, եւ համակարգիչների գումարը ծնողները կարող են մարել 2 տարում:
Անահիտ Բախշյանը անդրադարձավ նաեւ ուսուցիչների վերապատրաստման հարցին, քանի որ նրանց պարբերաբար վերապատրաստումը շատ կարեւոր է: Տիկին Բախշյանն ընդգծեց, որ այս տարի կառավարությունը ուսուցիչների վերապատրաստման համար մի դրամ անգամ չծախսեց, եւ 8000 ուսուցիչ վերապատրաստվեց սեփական գումարով` հեռավոր գյուղից մեկնելով մի ուրիշ գյուղ կամ քաղաք, կամ գալով Երեւան: Ստեղծված անհարմարությունն, իհարկե, վերապատրաստման որակի վրա չազդել չէր կարող:
