Աշնանացան ցորենի առաջին վերարտադրության սերմացու պետությունից ստանալու նպատակով հուլիսի 12-ի դրությամբ յոթ մարզից ստացվել է 147 նախնական ցանկ-հայտ: 2013-ի աշնանացանի համար կբաշխվի 3400 տոննա աշնանացան ցորենի առաջին վերարտադրության սերմացու: Այդ մասին երեկ որոշում ընդունեց կառավարությունը:
Նիստում հաստատվեց նաեւ հողօգտագործողներին 2013-ի աշնան գյուղատնտեսական աշխատանքների համար մատչելի գնով ազոտական պարարտանյութի ձեռքբերման պետական աջակցության ծրագիրը: Այդ նպատակով հատկացվեց ավելի քան 380 մլն դրամ: Այդ գումարով Հայաստան կներկրվի 8 հազար 310 տոննա ամոնիակային սելիտրա, որի 1 պարկը (50 կգ) 6 հազար դրամով կվաճառվի հողօգտագործողներին: Փոխվարչապետ Արմեն Գեւորգյանը տեղեկացրեց, որ իրագործվելու է նաեւ գյուղացիներին դիզվառելիքի տրամադրման պետական աջակցության ծրագիրը:
Երեք նոր տառեր մեքենաների համարանիշներում
Կառավարության որոշմամբ տրանսպորտային միջոցների համարանիշներում, բացի ներկայումս գործածվող A, D, L, M, N, O, P, Q, R, S, T, U եւ V տառերից, կարող են օգտագործվել նաեւ C, F, Z տառերը: Մեկ այլ որոշմամբ նոր գներ են սահմանվել մեծ պահանջարկ ունեցող համարանիշների հատկացման համար: Դրանց ձեռքբերման համար սահմանված 60000, 120000, 240000, 600000, 1200000 եւ 5000000 դրամ հաստատագրված վճարների փոխարեն սահմանվում են նոր հաստատագրված վճարներ` 60000, 150000, 250000, 400000, 600000, 1500000, 3000000 եւ 8000000 դրամ չափերով:
