Հունահռոմեական ոճի Հայաստանի հավաքականն այս օրերին ուսումնամարզական հավաք է անցկացնում Ավանի ֆուտբոլի ակադեմիայի մարզադահլիճում: Մեր ըմբիշները հավաքականի գլխավոր մարզիչ Լեւոն Ջուլֆալակյանի եւ նրա օգնականների գլխավորությամբ նախապատրաստվում են սեպտեմբերին Հունգարիայում կայանալիք ըմբշամարտի աշխարհի հերթական առաջնությանը:
Լեւոն Ջուլֆալակյանն արդեն կատարել է իր ընտրությունը: Հունգարիայում Հայաստանի մարզական պատիվը կպաշտպանեն Ռոման Ամոյանը (55 կգ), Ալեքսան Միքայելյանը (60 կգ), Սասուն Ղամբարյանը (66 կգ), Արսեն Ջուլֆալակյանը (74 կգ), Մաքսիմ Մանուկյանը (84 կգ), Արթուր Ալեքսանյանը (96 կգ) եւ Վաչիկ Եղիազարյանը (120 կգ):
Ավանում հավաքականի անդամները մարզումները կշարունակեն մինչեւ օգոստոսի 27-ը: Այնուհետեւ ըմբիշներին մեկ շաբաթ հանգիստ կտրամադրվի: Սեպտեմբերի 5-19-ը Հայաստանի հավաքականն ուսումնամարզական վերջին հավաքը կանցկացնի Բելառուսում, որտեղից էլ կուղեւորվի Բուդապեշտՙ մասնակցելու աշխարհի առաջնությանը:
