Ռումինիայի միջմշակութային ավանդույթների ասոցիացիան Ռումինիայում Հայաստանի եւ Լիբանանի դեսպանությունների, ինչպես նաեւ Իռլադիայի մշակութային տան աջակցությամբ օգոստոսի 12-19-ին կազմակերպել էր «Roots Revival Romania» միջոցառումը: Միջոցառմանը ՀՀ մշակույթի նախարարության աջակցությամբ Հայաստանը ներկայացնում էր դուդուկահար Էմանուել Հովհաննիսյանը:
Միջոցառման գաղափարն էր ռումինական ավանդական երաժշտության շուրջ միավորել տարբեր երկրների տաղանդաշատ կատարողների` համատեղ աշխատանքի եւ իմպրովիզացիաների միջոցով խթանելով միջմշակությային եւ միջէթնիկ երկխոսությունը: Յոթ երիտասարդ երաժիշտներ, աշխարհի 7 երկրներից առաջին անգամ առիթ ունեցան ծանոթանալու Ռումինիայի հեռավոր Մարամուրեշ բնակավայրի ավանդույթներին եւ սովորույթներին, որոնք ներշնչում են ռումինական ավանդական երաժշտությունը: Հայաստանից, Իրանից, Լիբանանից, Թուրքիայից, Մոլդովայից, Ռումինիայից եւ Իռլադիայից ժամանած երաժիշտները 7 օր շարունակ ստեղծագործեցին Մարամուրեշում` միմյանց փոխանցելով իրենց երաժշտական փորձը եւ ստեղծելով համատեղ ստեղծագործություններ:
Այս համատեղ աշխատանքի արդյունքում ստեղծվեց փորձնական մի համերգ, որը հանդիսատեսի դատին ներկայացվեց ս/թ օգոստոսի 19-ին Բուխարեստի Ռադիոյի դահլիճում: Մեկ ու կես ժամ տեւած համերգի ընթացքում ներկայացված ավանդական երաժշտության յուրովի մեկնաբանությունները ցնցեցին դահլիճը: Հանդիսականը առանձնահատուկ ոգեւորությամբ դիմավորեց հայ դուդուկահար Էմանուել Հովհաննիսյանի անզուգական կատարումները:
