Մեկնարկել է Դերենիկ Դեմիրճյանի «Քաջ Նազար» հեքիաթի հիման վրա ստեղծվող ֆիլմի նկարահանման աշխատանքները` ռեժիսոր Արմեն Ռոնովի մեկնաբանությամբ: Պսիխոդրամայի սցենարի հեղինակը, բեմադրող ռեժիսորն ու օպերատորը նույնպես Արմեն Ռոնովն է:
Քաջ Նազարին կմարմնավորի Ռաֆայել Քոթանջյանը, Նարցիսին` Անդրանիկ Ղազարյան, սակայն դերակատարներն այսքանով չեն սահմանափակվում, մնացած հերոսների անունը դեռեւս գաղտնի է պահվում: Ըստ ռեժիսորի, թեման շատ արդիական է, քանի որ «Քաջ Նազարի» հերոսներից շատերն այժմ մեր կյանքում կան. «Հեքիաթի առկայությունը ֆիլմերում շատ կարեւոր է, որն այսօր ցավոք պակասում է, նահանջ է ապրում»: Ռոնովը համոզված է, որ «Քաջ Նազարը» կլինի մշակութային ճանաչողական նոր ակցիա հեքիաթի ժանրը կինոյում վերածնելու հարցում»:
Ինչպես «Ազգ»ին տեղեկացրեց Ռոնովը, նկարահանումները տեղի կունենան ինչպես Կասկադում, այնպես էլ Արագածի վրա եւ այլուր:
Հատկանշական է, որ Արմեն Ռոնովի ֆիլմերը միշտ կինոքննադատների քննադատությանն են արժանանում, բոյկոտվում է, սակայն դա պատճառ չի հանդիսանում ռեժիսորի համար` ընկճվելու եւ դադարելու ստեղծագործել:
«Այս ֆիլմով մենք ճիշտն ենք պատմելու, ներկայացնելու` դեսպոտներին, ինչպես նաեւ խոսելու ենք սիրո մասին»,- ասաց ռեժիսորը եւ ավելացրեց, որ ներկայացվելու է նաեւ, թե ինչպես են արյան գնով հասնում գահի: Նա անդրադառնալու է նաեւ հոգեւորականներին, սակայն ոչ այնպես, ինչպես ընդունված է վերջիններիս ներկայացնել:
Ֆիլմը կլինի կարճամետրա՞ժ, թե՞ լիամետրաժ, ռեժիսորը չցանկացավ ասել` մեկնաբանելով. «Անկեղծ չգիտեմ, թե ի՞նչ է ընդհանրապես ժանրը, նման բաների չեմ հավատում: Չեմ կարող ասել, թե ո՞ր ժանրին կպատկանի, կամ որքան կտեւի: Ես ստեղծում եմ ու ներկայացնում հանդիսականի դատին: Նույնիսկ, երբ ֆիլմերս տարբեր փառատոների եմ ուղարկում, չեմ նշում ո՛չ ժանրը, ո՛չ էլ մետրաժը: Եթե իրենք 62 րոպեն լիամետրաժ են համարում, ապա թող իրենք էլ նշեն դա»:
Նշենք, որ ֆիլմի նկարահանումներին աջակցում է Ազգային կինոկենտրոնը, ՀՀ մշակույթի նախարարությունը, Սյունիքի մարզպետարանը, Հայ-ռուսական համալսարանը, Գաֆեսճեան արվեստի կենտրոնը եւ Ռոնով կինոարվեստանոցը:
Ֆիլմը նախատեսված է 12-ից բարձր տարիքի անձանց համար եւ հանդիսականի դատին կհանձնվի 2014թ.-ին:
